नुकत्याच पार पडलेल्या विधान परिषद निवडणुकांच्या निकालानंतर बिहारच्या राजकारणात एका मोठ्या घडामोडीने खळबळ उडवून दिली आहे. शिक्षक आणि पदवीधर मतदारसंघातून अपक्ष म्हणून निवडून आलेल्या दोन नवनिर्वाचित आमदारांनी पद आणि गोपनीयतेची शपथ घेण्यापूर्वीच भारतीय जनता पक्षात (BJP) प्रवेश केला आहे. या राजकीय समीकरणामुळे भाजपने आपले संख्याबळ वाढवले असून, विरोधी पक्षांसह महायुतीतील मित्रपक्षालाही मोठा धक्का बसला आहे.
शपथविधीपूर्वीच भाजपमध्ये प्रवेश
बिहारमधील सारण शिक्षक मतदारसंघातून अपक्ष म्हणून विजयी झालेले राहुल राज आणि तिरहुत पदवीधर मतदारसंघातून विजयी झालेले बंशीधर ब्रजवासी या दोघांनी औपचारिक शपथविधी आधीच भाजपचा झेंडा हातात घेतला. बिहारचे उपमुख्यमंत्री सम्राट चौधरी आणि भाजप प्रदेशाध्यक्ष संजय सरावगी यांच्या प्रमुख उपस्थितीत हा पक्षप्रवेश पार पडला. या पक्षप्रवेशामुळे बिहार विधान परिषदेत भाजपची ताकद आणखी वाढली आहे.
मित्रपक्ष ‘जेडीयू’च्या पराभूत उमेदवारांवरच भाजपचा डोळा
या राजकीय घडामोडीचे सर्वात मोठे वैशिष्ट्य म्हणजे, भाजपमध्ये प्रवेश केलेल्या या दोन्ही अपक्ष आमदारांनी निवडणुकीत भाजपचा मुख्य मित्रपक्ष असलेल्या जनता दल युनायटेडच्या (JDU) अधिकृत उमेदवारांचा पराभव केला होता. राहुल राज यांनी जेडीयूचे उमेदवार आनंद पुष्कर यांचा, तर बंशीधर ब्रजवासी यांनी अभिषेक झा यांचा पराभव करत दणदणीत विजय मिळवला होता. त्यामुळे आपल्याच मित्रपक्षाला पराभूत करणाऱ्या उमेदवारांना पक्षात घेतल्याने राजकीय वर्तुळात विविध चर्चांना उधाण आले आहे.
राष्ट्रीय जनता दलाचा (RJD) तीव्र आक्षेप
या पक्षप्रवेशावर विरोधी पक्षातील राष्ट्रीय जनता दलाने (RJD) अत्यंत आक्रमक भूमिका घेतली आहे. आरजेडीचे प्रवक्ते शक्ती सिंह यादव यांनी या घटनेवर टीका करताना, अशा प्रकारे शपथविधीपूर्वीच अपक्ष आमदारांना पक्षात समाविष्ट करून घेणे हे पूर्णपणे असंवैधानिक आणि लोकशाहीच्या तत्त्वांना हरताळ फासणारे आहे, असा गंभीर आरोप केला आहे.
हेही वाचा – ‘तुम्ही संविधानाचीच चोरी केली…’; ठाण्यात देवेंद्र फडणवीसांचा काँग्रेसवर घणाघात
4 राज्यांतील 28 जागांवर रंगला होता संग्राम
उल्लेखनीय आहे की, महाराष्ट्रातील 5, तसेच बिहार, उत्तर प्रदेश आणि कर्नाटक या 4 प्रमुख राज्यांतील एकूण 28 शिक्षक व पदवीधर मतदारसंघांसाठी ही निवडणूक पार पडली होती. महाराष्ट्रात महाविकास आघाडीने 3 जागा जिंकून वर्चस्व सिद्ध केले होते, तर बिहारमध्ये या नव्या पक्षप्रवेशांमुळे भाजपने राजकीय बाजी मारली आहे.
