मोठी बातमी! शिवसेनेत नाराजीचा सूर; बडा नेता ठाकरेंच्या गोटात परतणार? एकनाथ शिंदे संतापले, म्हणाले…

महाराष्ट्राच्या राजकारणात पुन्हा एकदा शिवसेनेतील अंतर्गत नाराजीची चर्चा सुरू झाली आहे. शिंदे गटाचे ज्येष्ठ नेते आणि माजी खासदार गजानन कीर्तिकर हे पक्षावर नाराज असल्याची माहिती समोर आली आहे. इतकेच नव्हे, तर ते पुन्हा उद्धव ठाकरे यांच्या शिवसेनेत प्रवेश करू शकतात, अशी चर्चा राजकीय वर्तुळात रंगू लागली आहे. मात्र, त्यांच्या घरवापसीबाबत अद्याप अधिकृत घोषणा झालेली नाही.

गजानन कीर्तिकर यांचे पुत्र अमोल कीर्तिकर हे उद्धव ठाकरे गटात सक्रिय आहेत. त्यामुळे गजानन कीर्तिकर यांच्या संभाव्य भूमिकेकडे राजकीय वर्तुळाचे लक्ष लागले आहे. वृत्तांनुसार, गजानन कीर्तिकर यांनी शिंदे गटाबाबत नाराजी व्यक्त केली असून, पक्षप्रमुखांशी संपर्क होत नसल्याची बाबही त्यांनी बोलून दाखवली आहे.

एकनाथ शिंदे नाराज; खुलासा करण्याची मागणी

गजानन कीर्तिकर यांच्या नाराजीच्या आणि ठाकरे गटात परतण्याच्या चर्चांवर उपमुख्यमंत्री एकनाथ शिंदे यांनी नाराजी व्यक्त केल्याचे वृत्त आहे. या घडामोडींवर प्रतिक्रिया देताना, अशी परिस्थिती असेल तर पक्षाला त्याबाबत विचार करावा लागेल, अशी भूमिका त्यांनी मांडल्याचे सांगितले जात आहे.

इतकेच नव्हे, तर गजानन कीर्तिकर यांच्या संध्याकाळच्या नियोजित कार्यक्रमाला उपस्थित राहण्याबाबतही निर्णय घ्यावा लागेल, असे शिंदे म्हणाल्याची माहिती समोर आली आहे. या प्रकरणावर कीर्तिकर यांनी खुलासा करावा, अशी अपेक्षाही व्यक्त करण्यात आली आहे.

दरम्यान, यापूर्वी उद्धव ठाकरे गटातील सहा खासदारांनी शिंदे गटात प्रवेश केल्याच्या पार्श्वभूमीवर आता उलट्या दिशेने राजकीय हालचाली होणार का, याची चर्चा सुरू आहे. गजानन कीर्तिकर यांचा पुढील निर्णय काय असेल आणि ते आपली भूमिका अधिकृतपणे स्पष्ट करणार का, याकडे सर्वांचे लक्ष लागले आहे.