CJP Protest: 2 तासांच्या बैठकीत सुटला जंतर-मंतरचा पेच; आंदोलकांवरील गुन्हे मागे घेण्यासह CJP च्या ‘या’ 3 मागण्या मान्य

CJP Protest:  दीर्घकाळ चाललेल्या ‘कॉकरोच जनता पार्टी’च्या (CJP) जंतर-मंतरवरील आंदोलनाची अखेर यशस्वी सांगता झाली आहे. केंद्र सरकारने सर्व प्रमुख मागण्या मंजूर केल्याचे स्पष्ट झाल्यानंतर CJP ने आपले आंदोलन मागे घेण्याची अधिकृत घोषणा केली असून, उपोषणकर्त्यांना व आंदोलकांना घरी परतण्याचे आवाहन केले आहे. केंद्रीय मंत्री जे.पी. नड्डा आणि जितेंद्र सिंह यांच्यासोबत CJP चे प्रवक्ते सौरव दास आणि आशुतोष रांका यांनी संयुक्त पत्रकार परिषद घेऊन या निर्णयाची माहिती दिली.

सरकारने मान्य केल्या तीनही प्रमुख मागण्या
पत्रकार परिषदेत दिलेल्या माहितीनुसार, सरकारने आंदोलकांच्या पुढील प्रमुख अटी स्वीकारल्या आहेत:

शिक्षणमंत्र्यांचा राजीनामा: केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिला आहे.

आर्थिक भरपाई: NEET पेपरफुटीच्या मानसिक त्रासातून आत्महत्या केलेल्या विद्यार्थ्यांच्या कुटुंबांना प्रत्येकी 1 कोटी रुपयांची आर्थिक मदत दिली जाईल.

गुन्हे मागे घेणार: दिल्ली व इतर राज्यांत आंदोलकांवर दाखल करण्यात आलेले सर्व एफआयआर (FIR) मागे घेतले जातील आणि कोणत्याही विद्यार्थ्यावर वा आंदोलकावर भविष्यात कोणतीही कायदेशीर कारवाई केली जाणार नाही.

2 तासांच्या प्रदीर्घ बैठकीनंतर तोडगा
दिल्लीतील ‘कॉन्स्टिट्यूशन क्लब’ येथे केंद्रीय मंत्री जे.पी. नड्डा आणि जितेंद्र सिंह यांच्यासोबत CJP प्रतिनिधींची सुमारे 2 तास सकारात्मक चर्चा झाली. या बैठकीत ठरलेल्या मुद्द्यांनुसार, निश्चित वेळेत सर्व अटींची पूर्तता केली जाईल, या विश्वासाने आंदोलन मागे घेतले जात असल्याचे सौरव दास यांनी स्पष्ट केले. तसेच, देशातील शिक्षण व्यवस्था आणि स्पर्धा परीक्षांच्या सुधारणेवर चर्चा करण्यासाठी 4 आठवड्यांनंतर पुन्हा एकदा केंद्रीय मंत्र्यांसोबत बैठक आयोजित केली जाणार आहे.

#WATCH | Delhi: After talks with the government, Cockroach Janta Party's National Spokesperson Ashutosh Ranka says, "We had demanded compensation of Rs 1 crore for the families of NEET victims. The government has agreed to this, stating that an honorary compensation will be given… pic.twitter.com/sDCtyymre6 — ANI (@ANI) July 25, 2026

हेही वाचा – Dharmendra Pradhan Resignation Reasons: धर्मेंद्र प्रधानांचा राजीनामा; मोदी सरकारला अखेर माघार का घ्यावी लागली? जाणून घ्या 8 मोठी कारणं

सोनम वांगचुक यांनी व्यक्त केला आनंद
या निर्णयाचे स्वागत करताना प्रसिद्ध सामाजिक कार्यकर्ते सोनम वांगचुक यांनी आनंद व्यक्त केला. “आज आपण खऱ्या अर्थाने लोकशाहीचा विजय पाहिला आहे. सरकार आणि धर्मेंद्र प्रधान यांनी दाखवलेल्या या सामंजस्याचे मी स्वागत करतो,” असे ते म्हणाले. हा मुद्दा पहिल्यांदा लावून धरणाऱ्या CJP टीमचे, तरुण स्वयंसेवकांचे आणि शांततेच्या मार्गाने लढा देणाऱ्या देशभरातील विद्यार्थ्यांचे त्यांनी विशेष आभार मानले. केवळ आंदोलन मागे घेऊन देश घडत नाही, तर आता शिक्षणात आणि प्रशासनात मोठ्या सुधारणा घडवून आणणे गरजेचे आहे. भीतीऐवजी आपुलकी आणि अन्यायाऐवजी सत्याच्या मार्गाने देशाचा कारभार चालवला जावा, अशी आशाही वांगचुक यांनी व्यक्त केली.