राम शिंदेंची ऐनवेळी माघार; अहिल्यानगर जिल्हा बँकेच्या निवडणुकीत मोठा ट्विस्ट, नेमकं कारण काय?

अहिल्यानगर: अहिल्यानगर जिल्हा मध्यवर्ती सहकारी बँकेच्या निवडणुकीला आता नवे वळण मिळाले आहे. विधान परिषदेचे सभापती प्रा. राम शिंदे यांनी जिल्हा बँकेच्या निवडणुकीतून माघार घेण्याचा निर्णय जाहीर केला आहे. त्यांच्या या निर्णयामुळे अहिल्यानगरच्या सहकार क्षेत्रासह राजकीय वर्तुळात चर्चांना उधाण आले आहे. काही दिवसांपासून राम शिंदे यांच्या संभाव्य उमेदवारीची चर्चा सुरू होती. मात्र, आता त्यांनी स्वतः निवडणुकीच्या रिंगणातून बाजूला होण्याचा निर्णय घेतला आहे.

घटनात्मक पदाची प्रतिष्ठा जपण्यासाठी निर्णय

राम शिंदे यांनी आपल्या माघारीमागे कोणताही राजकीय दबाव किंवा वैयक्तिक कारण नसल्याचे स्पष्ट केले आहे. विधान परिषदेचे सभापती हे घटनात्मक पद असल्याने या पदाची प्रतिष्ठा, गरिमा आणि निष्पक्षता कायम ठेवणे महत्त्वाचे आहे. त्यामुळे जिल्हा बँकेची निवडणूक न लढण्याचा निर्णय घेतल्याचे त्यांनी सांगितले.

या निर्णयामुळे त्यांच्या समर्थकांमध्येही चर्चा सुरू झाली आहे. विशेष म्हणजे, जिल्हा बँकेच्या निवडणुकीच्या पार्श्वभूमीवर शिंदे यांनी कर्जत-जामखेडमधील संघटनात्मक ताकदही दाखवून दिली होती.

दोन सेवा संस्थांच्या ठरावावरून वाद

कर्जत तालुक्यातील बारडगाव सुद्रिक आणि जामखेड तालुक्यातील दिसलेवाडी या दोन सेवा संस्थांच्या माध्यमातून आपला ठराव बिनविरोध झाल्याचे राम शिंदे यांनी सांगितले होते. या दोन्ही ठरावांमुळे कर्जत-जामखेडमधील कार्यकर्त्यांची संघटनात्मक ताकद स्पष्ट झाल्याचे त्यांनी नमूद केले.

मात्र, दोन वेगवेगळ्या तालुक्यांमधून ठराव झाल्याने त्यांच्या मतदार हक्काबाबत प्रश्न उपस्थित झाले. एकाच व्यक्तीला दोन ठिकाणी मतदानाचा अधिकार मिळू शकतो का, तसेच निवडणूक प्रक्रियेत त्यांची पात्रता काय असेल, यावरून विरोधकांकडून सवाल उपस्थित करण्यात आले. या मुद्द्यावरून गेल्या काही दिवसांत आरोप-प्रत्यारोपही झाले.

नियमांच्या मुद्द्यावरून विरोधकांवर निशाणा

या संपूर्ण वादावर भाष्य करताना राम शिंदे यांनी विरोधकांवरही टीका केली. मागील जिल्हा बँक निवडणुकीतील काही घटनांचा संदर्भ देत त्यांनी काही व्यक्तींनी भारतीय रिझर्व्ह बँकेच्या नियमांचे उल्लंघन केल्याचा आरोप केला. आरबीआयच्या दहा वर्षांच्या कालावधीशी संबंधित नियमांचा संदर्भ देत त्यांनी आपली भूमिका मांडली.

त्यामुळे जिल्हा बँकेची निवडणूक आता केवळ उमेदवारीपुरती मर्यादित राहिलेली नसून पात्रता, नियम आणि सहकार क्षेत्रातील राजकीय समीकरणांभोवतीही फिरताना दिसत आहे.

माघारीनंतर समीकरणे बदलणार?

राम शिंदे यांच्या माघारीमुळे अहिल्यानगर जिल्हा बँकेच्या निवडणुकीतील राजकीय समीकरणांवर परिणाम होण्याची शक्यता आहे. जिल्ह्यातील विविध राजकीय गटांकडून निवडणुकीसाठी जोरदार तयारी सुरू आहे. बँकेतील सत्तासमीकरण आपल्या बाजूने राहावे यासाठी नेत्यांकडून हालचाली सुरू असल्याचे चित्र आहे.

आता राम शिंदे निवडणुकीतून बाहेर पडल्यानंतर त्यांच्या समर्थकांची भूमिका काय असेल, कोणत्या गटाला त्यांचा पाठिंबा मिळणार आणि निवडणुकीचे पुढील चित्र कसे बदलणार, याकडे राजकीय वर्तुळाचे लक्ष लागले आहे.