Pawar Family Conflict during Baramati Byelection? : बारामती विधानसभा पोटनिवडणुकीच्या प्रचाराचा शेवटचा दिवस नाट्यमय घडामोडींनी गाजला. दिवंगत नेते अजित पवार यांच्या निधनानंतर रिक्त झालेल्या या जागेसाठी सुनेत्रा पवार यांच्या सांगता सभेचे आयोजन करण्यात आले होते. या सभेला खासदार सुप्रिया सुळे उपस्थित होत्या. परंतु, संपूर्ण सभेत त्यांनी सुनेत्रा वहिनींशी संवाद न साधणे ही बाब चर्चेचा केंद्रबिंदू ठरला. मंचावर आगमन झाल्यानंतर सुळे यांनी इतर सर्व नेत्यांशी संवाद साधला, मात्र सुनेत्रा पवारांच्या अगदी समोरून 3 वेळा जाऊनही त्यांनी साधी नजरभेट किंवा नमस्कारही केला नाही. सुप्रिया सुळेंच्या या वर्तणुकीमुळे राजकीय वर्तुळात अनेक तर्कवितर्क लावले जात आहेत.
सभेतील वातावरण आणि घोषणाबाजी
जेव्हा छगन भुजबळ यांचे भाषण सुरू होते, तेव्हाच सुप्रिया सुळे यांचे सभास्थळी आगमन झाले. त्यांचे स्वागत करण्यासाठी उपस्थितांनी टाळ्यांचा कडकडाट केला आणि संपूर्ण परिसर अजित पवारांच्या नावाच्या घोषणांनी दणाणून गेला. सुळे यांनी सर्वप्रथम मंचावर असलेल्या अजित पवारांच्या प्रतिमेला अभिवादन केले. सभेच्या ठिकाणी त्या सुमारे 30 मिनिटे उपस्थित होत्या. आश्चर्याची बाब म्हणजे, ज्या सुनेत्रा पवारांच्या प्रचारासाठी ही सभा होती, त्यांच्याशीच सुप्रिया सुळेंनी पूर्णपणे अबोला धरल्याची चर्चा सुरू झाली आहे. तसेच, कार्यकर्त्यांमध्येही आश्चर्य व्यक्त केले जात आहे.
हेही वाचा - Jai Pawar : बारामतीत जय पवारांचे भावूक बोल! 'दादां'च्या आठवणींना उजाळा देत सुनेत्रा वहिनींसाठी मतदारांना दिली साद
भाषण सुनेत्रा पवारांसाठी, पण संवाद शून्य
मंचावर संवाद टाळला असला तरी, आपल्या भाषणात सुप्रिया सुळे यांनी सुनेत्रा पवार यांना भरघोस मतांनी निवडून देण्याचे आवाहन मतदारांना केले. मात्र, भाषणाव्यतिरिक्त इतर वेळी त्यांच्यातील दुरावा स्पष्टपणे जाणवत होता. सभेत उपस्थित असलेल्या इतर मान्यवरांची आस्थेवाईकपणे चौकशी करणाऱ्या सुप्रियाताईंनी आपल्या वहिनीकडे पूर्णपणे दुर्लक्ष केल्याने पवार कुटुंबातील अंतर्गत कलह पुन्हा एकदा चव्हाट्यावर आला आहे का, अशा चर्चा रंगल्या आहेत. सुप्रिया सुळेंच्या या वागण्यामुळे 'ताई-वहिनी' यांच्यातील संबंधांमध्ये दुरावा निर्माण झाल्याचे बोलले जात आहे.
कार्यकर्त्यांमध्ये चर्चा आणि राजकीय परिणाम
प्रचाराच्या या सांगता सभेत सर्व दिग्गज नेत्यांनी हजेरी लावली होती, पण सर्वांचे लक्ष सुप्रिया सुळे आणि सुनेत्रा पवार यांच्या भेटीकडे होते. या सभेमुळे बारामतीतील राजकीय समीकरणे पुन्हा एकदा चर्चेत आली आहेत. कौटुंबिक नाते आणि राजकीय मंचावरील शिष्टाचार यांच्यातील ही ओढाताण कार्यकर्त्यांच्या चर्चेचा विषय ठरली आहे. सभेच्या शेवटच्या क्षणापर्यंत सुप्रिया सुळेंनी आपले मौन कायम ठेवले, ज्यामुळे विरोधकांना टीकेसाठी नवीन मुद्दा मिळाला आहे. पोटनिवडणुकीच्या निकालावर या 'शीतयुद्धा'चा काय परिणाम होतो, याकडे सर्वांचे लक्ष लागले आहे.
हेही वाचा - Sahar Shaikh: मुंब्रा नगरसेविका सहर शेख यांच्या अडचणीत वाढ; बोगस जात प्रमाणपत्र प्रकरणी आता फॉरेन्सिक चौकशीची टांगती तलवार