Abhijeet Dipke: कॉकरोच जनता पार्टीचे संस्थापक अभिजीत दीपके यांच्या नेतृत्वाखालील विद्यार्थी आंदोलनाने देशाच्या राजकारणात मोठे वादळ निर्माण केले आहे. त्यांच्या तीव्र आंदोलनामुळे अखेर केंद्रीय शिक्षणमंत्री धर्मेंद्र प्रधान यांना राजीनामा द्यावा लागला. या संघर्षात अभिजीत दिपके यांच्यासह आशुतोष रांका आणि सौरभ दास हे प्रमुख युवा चेहरे म्हणून समोर आले आहेत. आंदोलनाच्या स्वरूपावर प्रश्न उपस्थित करणाऱ्यांना उत्तर देताना दीपके यांनी स्पष्ट केले की, रस्त्यावर उतरून आंदोलन करणे ही त्यांची आवड नसून विद्यार्थ्यांवरील अन्यायामुळे घेतलेली ती लाचारी आहे. आत्महत्या केलेल्या दुर्दैवी विद्यार्थ्यांच्या कुटुंबांना तातडीने १ कोटी रुपयांची आर्थिक मदत मिळावी, ही त्यांची मुख्य मागणी आहे.
सरकारच्या धोरणांवर सडकून टीका आणि पोलिसांविरोधात मार्चची घोषणा
राजकीय घोडेबाजारावर रोखठोक भाष्य करताना दीपके म्हणाले की, लोकप्रतिनिधींची खरेदी-विक्री करण्यासाठी 50 ते 100 कोटी रुपये खर्च करणाऱ्या सरकारसाठी पीडित कुटुंबांना मदत देणे अजिबात कठीण नाही. आपल्या मागण्यांवर ठाम राहत त्यांनी येत्या 5 सप्टेंबर रोजी इंडिया गेट ते थेट पोलीस मुख्यालयापर्यंत भव्य निषेध मोर्चा काढण्याची घोषणा केली आहे. निष्पाप विद्यार्थ्यांवर दाखल करण्यात आलेले खोटे गुन्हे तात्काळ मागे घेण्यात यावेत आणि बाधित कुटुंबांचे पुनर्वसन करण्यात यावे, या प्रमुख मागण्यांसाठी हा मार्च असणार आहे. या नव्या घोषणेमुळे दिल्लीच्या प्रशासकीय वर्तुळात मोठी खळबळ उडाली आहे.
"आम्ही मार खाणारे लोक"; लाठीमाराच्या भीतीला न जुमानता लढा सुरूच ठेवण्याचा निर्धार
मोर्चादरम्यान होणाऱ्या हिंसेबाबत विचारले असता, आंदोलनावरील पोलीस कारवाईचा उल्लेख करत दीपके यांनी अत्यंत आक्रमक आणि भावुक प्रतिक्रिया दिली. "आम्ही हक्कासाठी मार खाऊन आलेलो लोक आहोत. मला आणि आशुतोष रांकाला यापूर्वी अमानुष मारहाण झाली आहे; आता फक्त सौरभ दास वाचला असून कदाचित पुढचा नंबर त्याचा असेल. मात्र, कितीही लाठ्या-काठ्या चालवल्या तरी आमचा लढा थांबणार नाही," असा रोखठोक इशारा त्यांनी दिला. या इशाऱ्यामुळे केंद्र सरकार आणि पोलीस प्रशासन पूर्णपणे अलर्ट मोडवर आले आहे.
राजकारणात प्रवेश नाही; जिल्हा परिषद शाळांच्या सुधारणेवर भर
दिल्लीतील केंद्रीय लढ्यासोबतच अभिजीत दीपके यांनी ग्रामीण भागातील शैक्षणिक समस्यांवरही लक्ष केंद्रित केले आहे. नुकताच त्यांनी हिंगोली जिल्ह्यातील अनेक जिल्हा परिषद शाळांची प्रत्यक्ष पाहणी करून तेथील दुरवस्थेवर बोट ठेवले. छत्रपती संभाजीनगर येथे पार पडलेल्या पक्षाच्या महत्त्वाच्या बैठकीत त्यांनी आपली आगामी रणनीती स्पष्ट केली. सध्या कोणताही प्रत्यक्ष राजकीय प्रवेश किंवा निवडणूक लढवण्याचा मानस नसून, केवळ विद्यार्थी, तरुण आणि शिक्षण क्षेत्रातील समस्या सोडवण्यासाठीच पूर्ण ताकदीने संघर्ष करत राहणार असल्याचे त्यांनी स्पष्ट केले.
