मुंबई: मुंबई क्रिकेट संघाचे माजी कर्णधार आणि निवड समिती सदस्य असलेले मिलिंद रेगे यांचे बुधवारी हृदयविकाराच्या झटक्याने निधन झाले. 16 फेब्रुवारीला त्यांचा 76वा वाढदिवस होता.
रेगे यांनी 1966-67 ते 1977-78 या कालावधीत मुंबई संघाचे प्रतिनिधित्व केले. त्यांनी आपल्या 52 प्रथम श्रेणी सामन्यांमध्ये 126 बळी घेतले आणि 23.56 च्या सरासरीने 1532 धावा केल्या. क्रिकेटमधून निवृत्त झाल्यानंतर त्यांनी मुंबई क्रिकेट असोसिएशनमध्ये (MCA) विविध पदांवर महत्त्वपूर्ण भूमिका बजावली.
1988 मध्ये जेव्हा तरुण सचिन तेंडुलकरला रणजी संघात स्थान देण्यात आले, तेव्हा रेगे मुंबई निवड समितीचे सदस्य होते. 2006 मध्ये त्यांनी मुंबई संघासाठी व्हिडिओ विश्लेषकसाठी मोठ्या प्रमाणात विरोध केला गेला होता. व्हिडिओ विश्लेषक वापरण्याच्या निर्णयाला पाठिंबा दिला, जो त्या काळात क्रिकेटमध्ये नवीन तंत्रज्ञान मानले जात होते.
MCA अध्यक्ष अजिंक्य नाईक यांनी त्यांच्या निधनावर शोक व्यक्त करताना म्हणाले, "मिलिंद रेगे सरांच्या निधनाची बातमी ऐकून अतिशय दुःख झाले. मुंबई क्रिकेटच्या वाटचालीत त्यांचे योगदान अमूल्य होते. खेळाडू, निवडकर्ता आणि मार्गदर्शक म्हणून त्यांनी अनेक पिढ्यांना घडवले. त्यांची आठवण सदैव जपली जाईल. त्यांच्या कुटुंबीयांना आणि चाहत्यांना मनःपूर्वक श्रद्धांजली."
रेगे आणि सुनील गावस्कर हे बालपणीचे मित्र होते. त्यांनी एकाच शाळेत व महाविद्यालयात शिक्षण घेतले आणि दोघेही दादर युनियन स्पोर्टिंग क्लबसाठी खेळले. विशेष म्हणजे, 26व्या वर्षी क्रिकेट कारकिर्दीत असतानाही त्यांना हृदयविकाराचा झटका आला होता. मात्र, त्यानंतरही ते पुनरागमन करण्यात यशस्वी झाले.
2020 पासून ते मुंबई क्रिकेट असोसिएशनमध्ये सल्लागार म्हणून कार्यरत होते. त्यांच्या जाण्याने मुंबई क्रिकेटने एक महान खेळाडू आणि मार्गदर्शक गमावला आहे.