Ranji Trophy: जम्मू आणि काश्मीर क्रिकेट संघाने रणजी ट्रॉफीच्या 91 वर्षांच्या इतिहासात एक सुवर्ण अध्याय जोडला आहे. हुबळी येथील KSCA स्टेडियमवर खेळल्या गेलेल्या अटीतटीच्या अंतिम सामन्यात, जम्मू आणि काश्मीरने बलाढ्य कर्नाटक संघावर पहिल्या डावात आघाडी घेत 2025-26 या हंगामाचे विजेतेपद आपल्या नावावर केले. 8 वेळा विजेतेपद पटकावणाऱ्या कर्नाटकसारख्या अनुभवी संघाला नमवून पहिल्यांदाच अंतिम फेरीत प्रवेश करणाऱ्या जम्मू-काश्मीरने क्रिकेट विश्वाला थक्क केले आहे.
67 वर्षांची प्रतीक्षा संपली; नवीन युगाची सुरुवात
जवळपास 67 वर्षांपूर्वी रणजी ट्रॉफीमध्ये पदार्पण करणाऱ्या जम्मू आणि काश्मीर क्रिकेट संघाने अनेक भौगोलिक आणि पायाभूत अडथळ्यांवर मात करून हे यश संपादन केले आहे. १९३४-३५ मध्ये सुरू झालेल्या या प्रतिष्ठित स्पर्धेत जम्मू आणि काश्मीरला चॅम्पियन बनण्यासाठी 66 वर्षांहून अधिक काळ वाट पाहावी लागली. हा विजय केवळ एक ट्रॉफी नसून संपूर्ण प्रदेशासाठी नवीन आशेचे प्रतीक मानला जात आहे. या ऐतिहासिक विजयामुळे खोऱ्यातील तरुण क्रिकेटपटूंना मोठी प्रेरणा मिळणार असून भारतीय क्रिकेटमध्ये एका नवीन युगाची सुरुवात झाली आहे.
विजेत्या संघांची यादी: कोणी किती वेळा जिंकली ट्रॉफी?
42 वेळा – मुंबई
8 वेळा – कर्नाटक/म्हैसूर
7 वेळा – दिल्ली
5 वेळा – मध्य प्रदेश/होळकर
5 वेळा – बडोदा
3 वेळा – सौराष्ट्र/नवनगर
3 वेळा – विदर्भ
2 वेळा – बंगाल
2 वेळा – तामिळनाडू/मद्रास
2 वेळा – राजस्थान
2 वेळा – हैदराबाद
2 वेळा – महाराष्ट्र
2 वेळा – रेल्वे
1 वेळा – जम्मू आणि काश्मीर
1 वेळा – उत्तर प्रदेश
1 वेळा – पंजाब
1 वेळा – हरियाणा
1 वेळा – गुजरात
1 वेळा – पश्चिम भारत
रणजी ट्रॉफीचा इतिहास आणि मुंबईचे वर्चस्व
भारतीय देशांतर्गत क्रिकेटमधील सर्वोच्च समजल्या जाणाऱ्या रणजी ट्रॉफीमध्ये आतापर्यंत अनेक संघांनी आपले वर्चस्व गाजवले आहे. यामध्ये मुंबई संघाने सर्वाधिक 42 वेळा विजेतेपद जिंकून आपला दबदबा कायम राखला आहे. मात्र, अलीकडच्या काही वर्षांत विदर्भ, सौराष्ट्र आणि आता जम्मू-काश्मीर यांसारख्या उदयोन्मुख संघांनी पारंपारिक सत्ताकेंद्रांना आव्हान दिले आहे.
