इंडियन प्रीमियर लीग मधील अत्यंत यशस्वी फ्रँचायझी असलेल्या मुंबई इंडियन्सने आपल्या व्यवस्थापनात मोठा आणि महत्त्वाचा बदल करत वेस्ट इंडिजचा माजी अष्टपैलू खेळाडू किएरॉन पोलार्ड याच्याकडे मुख्य प्रशिक्षकपदाची धुरा सोपवली आहे. गेल्या 16 वर्षांपासून मुंबई इंडियन्स कुटुंबाचा अविभाज्य भाग असलेल्या पोलार्डच्या या नव्या भूमिकेमुळे मुंबई इंडियन्सच्या प्रवासात एका नव्या अध्यायाची सुरुवात झाली आहे. एक दिग्गज फलंदाज आणि त्यानंतर फलंदाजी प्रशिक्षक म्हणून संघाला यशस्वी योगदान दिल्यानंतर आता तो मुख्य प्रशिक्षक म्हणून युवा खेळाडूंना मार्गदर्शन करताना दिसणार आहे.
16 वर्षांचे नाते आणि नीता अंबानी यांच्याकडून कौतुक
किएरॉन पोलार्डच्या या पदोन्नतीबद्दल मुंबई इंडियन्सच्या सह-मालक नीता अंबानी यांनी मनापासून आनंद व्यक्त केला आहे. नीता अंबानी म्हणाल्या की, जेव्हा पोलार्ड पहिल्यांदा मुंबई इंडियन्समध्ये आला, तेव्हा त्याचे वय अवघे 22 वर्षे होते. गेल्या 16 वर्षांत त्याने आपल्या अफाट कौशल्याने आणि खेळावरील निष्ठेने संघाला अनेक संस्मरणीय विजय मिळवून दिले आहेत. मुंबई इंडियन्सची निळी-सोनेरी जर्सी घातल्यानंतर मैदानावर कशी कामगिरी करायची, याची पोलार्डला उत्तम समज आहे. तो एक उत्तम मार्गदर्शक असून नव्या भूमिकेतही तो संघाला यशाच्या शिखरावर नेईल, असा विश्वास त्यांनी व्यक्त केला.
‘मुख्य प्रशिक्षकपद सांभाळणे हा मोठा सन्मान’; पोलार्डने मानले आभार
मुख्य प्रशिक्षकपदी निवड झाल्यानंतर आपली प्रतिक्रिया देताना किएरॉन पोलार्ड म्हणाला की, मुंबई इंडियन्सचे मुख्य प्रशिक्षकपद भूषवणे हा माझ्यासाठी अत्यंत मानाचा क्षण आहे. मुंबई इंडियन्स हा माझ्या वैयक्तिक आयुष्याचा आणि क्रिकेट कारकिर्दीचा सर्वात महत्त्वाचा भाग राहिला आहे. खेळाडू आणि प्रशिक्षक या दोन्ही भूमिका पार पाडल्यामुळे या संघाचे मूल्य आणि पाठीशी असलेल्या लाखो चाहत्यांच्या अपेक्षा मला चांगल्या प्रकारे ठाऊक आहेत. नीता अंबानी, आकाश अंबानी आणि संपूर्ण एमआय व्यवस्थापनाने दाखवलेल्या विश्वासाबद्दल त्याने आभार मानले. आगामी हंगामात खेळाडू व सपोर्ट स्टाफसोबत मिळून संघाचा विजयी वारसा पुढे नेण्यासाठी मी उत्सुक असल्याचेही त्याने स्पष्ट केले.
