Vijay Hazare Trophy: भारतीय संघाचा स्फोटक फलंदाज आणि मुंबईचा कर्णधार श्रेयस अय्यरने क्रिकेटच्या मैदानावर दिमाखदार पुनरागमन केले आहे. 3 महिन्यांहून अधिक काळ दुखापतीमुळे मैदानाबाहेर असलेल्या अय्यरने विजय हजारे ट्रॉफी 2025-26 मध्ये आपल्या बॅटने प्रतिस्पर्धी गोलंदाजांची दाणादाण उडवली.
केवळ 53 चेंडूत 82 धावांचा पाऊस
6 जानेवारी रोजी हिमाचल प्रदेश विरुद्ध झालेल्या सामन्यात श्रेयस अय्यरने कर्णधाराला साजेसा डाव खेळला. त्याने केवळ 53 चेंडूंमध्ये 150 पेक्षा जास्त स्ट्राइक रेटने 82 धावा फटकावल्या. या खेळीत त्याने 10 चौकार आणि 3 उत्तुंग षटकार मारले. दुखापतीतून सावरल्यानंतर त्याने पहिल्याच सामन्यात आपण फॉर्मात असल्याचे सिद्ध केले आहे.
दुखापतीमुळे होता मैदानाबाहेर
ऑक्टोबर 2025 मध्ये ऑस्ट्रेलिया दौऱ्यादरम्यान झेल घेताना श्रेयस अय्यरला गंभीर दुखापत झाली होती. या दुखापतीमुळे त्याला रुग्णालयात दाखल करावे लागले होते आणि तो दक्षिण आफ्रिकेविरुद्धच्या एकदिवसीय मालिकेलाही मुकला होता. मात्र, प्रदीर्घ काळानंतर मिळालेल्या संधीचे त्याने सोने केले.
मुंबईला दिले 299 धावांचे लक्ष्य
प्रथम फलंदाजी करताना मुंबईची अवस्था 55 धावांत 2 बाद अशी नाजूक झाली होती. मात्र, सलामीवीर मुशीर खान (73 धावा, 51 चेंडू) आणि श्रेयस अय्यर यांनी संघाचा डाव सावरला. अय्यरने संघाचा स्कोअर वेगाने 200 च्या पुढे नेला. तो शतकाच्या जवळ पोहचला असताना 26 व्या षटकात बाद झाला. त्याच्या या खेळीच्या जोरावर मुंबईने हिमाचल प्रदेशसमोर विजयासाठी 299 धावांचे आव्हान ठेवले.
टीम इंडियासाठी गुड न्यूज
अय्यरचा हा फॉर्म भारतीय संघासाठी अत्यंत महत्त्वाचा आहे. 11 जानेवारीपासून न्यूझीलंडविरुद्ध सुरू होणाऱ्या एकदिवसीय मालिकेसाठी अय्यरची भारतीय संघात निवड झाली आहे. विशेष म्हणजे, या मालिकेत त्याच्यावर उपकर्णधारपदाची जबाबदारी सोपवण्यात आली आहे. न्यूझीलंडविरुद्धच्या मालिकेपूर्वी अय्यरची ही खेळी भारतीय चाहत्यांसाठी मोठा सुखद संकेत मानला जात आहे.
