Al-Qaeda Statement on Flydubai Flight Hijack Attempt 2026: दुबईहून तेल अवीवच्या दिशेने जाणाऱ्या ‘फ्लायदुबई’च्या विमानावरील थरारक अपहरणाचा प्रयत्न आणि कॅप्टनवरील हल्ल्याच्या घटनेचे कुख्यात दहशतवादी संघटना ‘अल-कायदा’ने उघडपणे कौतुक केले आहे. एका आंतरराष्ट्रीय अहवालानुसार, अल-कायदाच्या समर्थकांनी जुलै महिन्यात सुरू केलेल्या ‘अल-बयान’ या साप्ताहिक नियतकालिकाच्या ताज्या अंकात यासंदर्भात एक चिथावणीखोर लेख प्रसिद्ध करण्यात आला आहे. टेलीग्राम चॅनेलवरून नंतर हटवण्यात आलेल्या या अरबी भाषेतील लेखात, अल-कायदाने या अपहरणाच्या प्रयत्नाची थेट 11 सप्टेंबर 2001 (9/11) रोजी अमेरिकेत झालेल्या भीषण दहशतवादी हल्ल्यांशी तुलना केली आहे. यासोबतच अमेरिका आणि इस्रायली नागरिकांना घेऊन जाणाऱ्या विमानांना पुन्हा लक्ष्य करण्याचे खुले आवाहन करण्यात आले आहे.
30 सप्टेंबर रोजी फ्लाईदुबई विमानावर कॉकपिटमध्ये हल्ला
ही संपूर्ण धक्कादायक घटना 30 सप्टेंबर रोजी घडली, जेव्हा फ्लाईदुबईचे FZ1073 हे विमान 170 हून अधिक प्रवासी आणि क्रू मेंबर्ससह दुबईहून तेल अवीवच्या दिशेने उड्डाण करत होते. प्रवाशांमध्ये बहुतांश इस्रायली नागरिक असलेल्या या विमानात अल-हम्मामी नावाच्या व्यक्तीने कॉकपिटमधील आपत्कालीन कुऱ्हाडीने कॅप्टन स्मित मच्छार यांच्यावर अचानक जीवघेणा हल्ला चढवला. हल्ल्यानंतर विमानाने आणीबाणीचा (Emergency) संदेश पाठवला आणि ते अवघ्या काही मिनिटांत 34,000 फीट उंचीवरून थेट 17,000 फीटपर्यंत खाली कोसळू लागले. कॉकपिटचा दरवाजा उघडण्यास सह-पायलटने विरोध केला तरीही गंभीर जखमी कॅप्टन मच्छार यांनी प्रसंगावधान राखून दरवाजा उघडला आणि प्रवाशांच्या मदतीने हल्लेखोराला डांबले.
सौदी अरेबियातील तबुक विमानतळावर सुरक्षित लँडिंग
विमानाचे नियंत्रण सुटत असल्याचे लक्षात येताच विमानात प्रवासी म्हणून प्रवास करणाऱ्या दोन राखीव वैमानिकांनी (Reserve Pilots) तत्काळ कॉकपिटचा ताबा घेतला. त्यांनी धाडसाने परिस्थिती हाताळत विमानाला सौदी अरेबियातील तबुक येथील प्रिन्स सुलतान बिन अब्दुलअजीज विमानतळावर सुरक्षितपणे उतरवले. विमान जमिनीवर उतरताच स्थानिक सुरक्षा यंत्रणांनी तत्काळ कारवाई करत हल्लेखोर अल-हम्मामी याला ताब्यात घेतले. या संपूर्ण घटनेच्या चित्रांचा वापर करत अल-कायदाने आपल्या साप्ताहिकात वर्ल्ड ट्रेड सेंटरवरील हल्ल्याच्या फोटोंसह हे वृत्त प्रसिद्ध केले होते.
हेही वाचा – दुबई-इस्रायल विमानातील हल्लेखोर सह-वैमानिकाची ओळख पटली; सीरिया कनेक्शनसह बॅगेत सापडले धक्कादायक साहित्य
‘इस्लामविरोधी काफिर सैनिकांची विमाने आजही टप्प्यात’; अल-कायदाची धमकी
अल-बयानमधील लेखात अत्यंत आक्रमक भाषा वापरत अल-कायदाने लिहिले आहे की, ‘हा जिहाद आणि संघर्षाचा काळ अजून संपलेला नाही. इस्रायली, अमेरिकन आणि इस्लामविरोधात लढणाऱ्या सर्व ‘काफिर शत्रूंची’ विमाने आजही आकाशात वावरत असून ती सहज टप्प्यात येऊ शकतात.’ अमेरिका आणि इस्रायलच्या विरोधात आज जगभरात अभूतपूर्व असंतोष असून दुष्ट अमेरिकन साम्राज्याचा अंत होण्याचा दिवस फार लांब नाही, असा दावाही या दहशतवादी पत्रिकेतून करण्यात आला आहे.
आंतरराष्ट्रीय विमान वाहतूक सुरक्षेबाबत जागतिक पातळीवर चिंता
या अपहरणाच्या प्रयत्नानंतर आणि अल-कायदाने दिलेल्या नव्या धमकीमुळे जागतिक स्तरावर आंतरराष्ट्रीय विमान वाहतुकीच्या सुरक्षेबाबत गंभीर चिंता व्यक्त केली जात आहे. विशेषतः मध्यपूर्वेतील सध्याच्या तणावपूर्ण वातावरणाच्या पार्श्वभूमीवर अमेरिकन व इस्रायली विमान कंपन्यांच्या उड्डाणांसाठी सुरक्षा व्यवस्था अधिक कडक करण्याचे संकेत देण्यात आले आहेत. टेलीग्रामवरून हा मजकूर हटवण्यात आला असला तरी गुप्तचर यंत्रणांनी या संपूर्ण घडामोडींची अत्यंत गांभीर्याने दखल घेतली आहे.
हेही वाचा – आकाशात कॉकपिटमध्ये नेमकं काय घडलं? फ्लाय दुबईच्या विमानामधील प्लंबरने सांगितला थरार
