पंतप्रधान मोदी अन् डोनाल्ड ट्रम्प यांच्यात चर्चा; कोणत्या विषयावर झालं खलबतं?

India US Relations: पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांच्यात उच्चस्तरीय टेलिफोनिक चर्चा पार पडली. या बैठकीत दोन्ही देशांमधील द्विपक्षीय संबंध अधिक मजबूत करण्यासोबतच विविध महत्त्वपूर्ण क्षेत्रांतील परस्पर सहकार्याचा सविस्तर आढावा घेण्यात आला. खुद्द पंतप्रधान नरेंद्र मोदी यांनी ‘X’ (ट्विटर) या सोशल मीडिया प्लॅटफॉर्मवर पोस्ट करत या फलदायी चर्चेची माहिती दिली आहे. दोन्ही देशांमधील ‘सर्वसमावेशक जागतिक धोरणात्मक भागीदारी’ अधिक पुढे नेण्यासाठी निरंतर आणि निकटचा संपर्क कायम ठेवण्यावर दोन्ही नेत्यांचे पूर्ण एकमत झाले आहे.

व्यापार, संरक्षण अन् तंत्रज्ञानावर विशेष भर

पंतप्रधान मोदी यांनी दिलेल्या माहितीनुसार, या चर्चेदरम्यान भारत आणि अमेरिका यांच्यातील व्यापार, संरक्षण (Defence), ऊर्जा (Energy) आणि महत्त्वपूर्ण तंत्रज्ञान (Critical Technologies) या महत्त्वाच्या क्षेत्रांमधील सहकार्याचा आढावा घेण्यात आला. दोन्ही देशांमधील आर्थिक आणि धोरणात्मक संबंध अधिक दृढ करण्याच्या दृष्टीने ही चर्चा अत्यंत महत्त्वपूर्ण मानली जात आहे. आगामी काळात या क्षेत्रांमध्ये एकत्रित काम करण्याची कटिबद्धता दोन्ही नेत्यांनी व्यक्त केली.

Had a productive conversation with President Trump. We reviewed our bilateral cooperation in trade, defence, energy, critical technologies and other areas. We agreed to maintain close engagement to take our Comprehensive Global Strategic Partnership forward. We also exchanged… — Narendra Modi (@narendramodi) September 30, 2026

हेही वाचा – मोदी सरकारचा शेतकऱ्यांना मोठा दिलासा! गव्हाच्या MSP मध्ये 25 रुपयांची वाढ; आता प्रति क्विंटलला मिळणार ‘इतका’ दर

जागतिक शांतता आणि सुरक्षेसाठी एकत्र काम करण्याचे संकेत

केवळ द्विपक्षीय संबंधांपुरते मर्यादित न राहता, पंतप्रधान मोदी आणि राष्ट्राध्यक्ष ट्रम्प यांनी प्रादेशिक तसेच आंतरराष्ट्रीय मुद्द्यांवरही सविस्तर विचारविनिमय केला. जगभरात शांतता आणि सुरक्षा प्रस्थापित करण्यासाठी सुरू असलेल्या जागतिक प्रयत्नांवर या चर्चेत विशेष भर देण्यात आला. आंतरराष्ट्रीय स्तरावर स्थिरता राखण्यासाठी आणि विविध जागतिक आव्हानांचा सामना करण्यासाठी भारत आणि अमेरिका एकत्र येऊन काम करतील, असा विश्वास दोन्ही नेत्यांनी व्यक्त केला.