‘250 टक्के टॅरिफची धमकी..’ ट्रम्प पुन्हा बरळले; भारत-पाकिस्तान संघर्ष रोखण्याबाबत नवा दावा

Donald Trump India Pakistan War Claim Update: अमेरिकेचे राष्ट्राध्यक्ष डोनाल्ड ट्रम्प यांनी भारत आणि पाकिस्तानमधील लष्करी तणाव रोखण्यासाठी दोन्ही देशांना अमेरिकेकडून 250 टक्के आयात शुल्क (Tariff) लादण्याची धमकी दिल्याचा पुनरुच्चार केला आहे. एप्रिल 2025 मध्ये झालेल्या पहलगाम हल्ल्यानंतर भारताने पाकिस्तानविरोधात ‘ऑपरेशन सिंदूर’ सुरू करून कडक पावले उचलली होती, ज्यामुळे दोन्ही देशांत युद्धसदृश परिस्थिती निर्माण झाली होती. अण्वस्त्रसज्ज असलेल्या या दोन्ही शेजारी राष्ट्रांमधील संभाव्य युद्ध रोखण्यासाठी आपण थेट हस्तक्षेप केला आणि त्यामुळेच दोन्ही देशांनी गोळीबार थांबवला, असा दावा ट्रम्प यांनी एका कार्यक्रमात बोलताना केला आहे, असे वृत्त एका आंतरराष्ट्रीय वृत्तसंस्थेने दिले आहे.

‘अमेरिकेसोबत व्यापार बंद करू’; ट्रम्प यांच्या इशाऱ्याने दोन्ही देशांचे नेते संतापल्याचे विधान
आपल्या वक्तव्यादरम्यान डोनाल्ड ट्रम्प म्हणाले की, ‘दोन अण्वस्त्रसज्ज देश युद्धाच्या उंबरठ्यावर असताना मी त्यांच्या नेत्यांना स्पष्ट इशारा दिला होता. जर तुम्ही हा संघर्ष असाच सुरू ठेवला, तर तुम्हाला अमेरिकेसोबत अजिबात व्यापार करता येणार नाही. मी तुम्हा दोघांवर 250 टक्के प्रचंड टॅरिफ लावेन, ज्यामुळे तुमचा व्यापार ठप्प होईल.’ या धमकीवजा इशाऱ्यामुळे भारत आणि पाकिस्तानचे संबंधित नेते खूप नाराज आणि संतापले होते, परंतु या व्यापारी दबावामुळेच अखेर दोन्ही देशांनी सीमेवरील गोळीबार थांबवला आणि युद्ध टळले, असे ट्रम्प यांनी नमूद केले.

हेही वाचा – ‘भारताची लोकसंख्या जगाच्या 17 टक्के, पण कार्बन उत्सर्जन अवघे 3 टक्के’; हवामान बदलावरून पियुष गोयल यांनी पाश्चात्य देशांना सुनावले

11 विमानांचा उल्लेख; मात्र कोणत्याही स्वतंत्र पुराव्याचा अभाव
याच चर्चेदरम्यान ट्रम्प यांनी या संपूर्ण संघर्षात 11 विमाने पाडण्यात आल्याचा एक नवा आणि विचित्र दावा केला. मात्र, पाडण्यात आलेल्या या विमानांविषयी त्यांनी कोणताही ठोस तपशील किंवा स्वतंत्र पुरावा दिला नाही. जगभरातील अशी अनेक संभाव्य युद्धे आपण केवळ आपल्या कणखर भूमिकेमुळे आणि धोरणांमुळे रोखली असून, हे काम करणे हा आपल्यासाठी एक मोठा सन्मान असल्याची फुशारकी ट्रम्प यांनी पुन्हा एकदा मारली. त्यांच्या या वक्तव्यामुळे आंतरराष्ट्रीय राजकारणात पुन्हा एकदा नव्या चर्चांना उधाण आले आहे.

#WATCH | US President Donald Trump says, “…You stop India and Pakistan, two nuclear nations… I said, “Fellas, if you guys are going to do that, you’re not going to trade with the United States…I’m going to put massive tariffs on both of you, 250 percent, so you won’t be able to do any business.” They got very upset, very angry; they stopped shooting, and the war was over…Eleven planes were shot. I stopped all these wars, and it’s really an honor to do so…” (Video Source: Reuters) — ANI (@ANI) October 23, 2026

भारताची मध्यस्थीच्या दाव्यांवर ठाम भूमिका; तिसऱ्या देशाचा हस्तक्षेप फेटाळला
डोनाल्ड ट्रम्प यांच्या या दाव्यांवर भारताची अधिकृत भूमिका नेहमीच स्पष्ट राहिली आहे. भारत आणि पाकिस्तानमधील तणाव कमी करण्यासाठी किंवा लष्करी कारवाया थांबवण्यासाठी कोणत्याही तिसऱ्या देशाची मध्यस्थी स्वीकारली गेली नव्हती, हा भारताचा जुनाच निर्णय आहे. भारत-पाकिस्तानमधील लष्करी कारवाईबाबतचे संभाषण आणि निर्णय हे दोन्ही देशांच्या डायरेक्टर जनरल ऑफ मिलिट्री ऑपरेशन्स (DGMO) द्वारे थेट झाले होते, त्यामुळे ट्रम्प यांच्या दाव्यांमध्ये आणि भारताच्या अधिकृत भूमिकेत मोठी तफावत दिसून येते.

हेही वाचा – ‘अभिजीत दिपकेंसारख्या प्रवृत्तीमुळे धोरणांमध्ये अडचणी येतात!’ केंद्रीय मंत्री पीयुष गोयल यांच्या बर्लिनमधील विधानाने खळबळ