अमेरिकेची राजधानी वॉशिंग्टन डीसी (Washington DC) येथे माध्यमांशी संवाद साधताना अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी ब्रिटनच्या राजघराण्याशी संबंधित प्रिन्स अँड्र्यू माउंटबॅटन-विंडसर (Prince Andrew Mountbatten-Windsor) यांच्या अटकेबाबत प्रतिक्रिया देताना ही घटना “अत्यंत लाजिरवाणी” असल्याचे म्हटले आहे. ट्रम्प यांनी स्पष्ट शब्दांत सांगितले की, या प्रकरणामुळे ब्रिटिश राजघराण्याच्या (British Royal Family) प्रतिमेला मोठा धक्का बसला असून ही परिस्थिती संपूर्ण संस्थेसाठी लाजिरवाणी ठरत आहे.
दरम्यान, लैंगिक गुन्हेगार आणि मानव तस्करी प्रकरणातील दोषी जेफ्री एपस्टीन (Jeffrey Epstein) याच्याशी कथित संबंध आणि युनायटेड किंगडमचे (United Kingdom) माजी ट्रेड एन्वॉय (Trade Envoy) म्हणून कार्यरत असताना सार्वजनिक पदावरील गैरवर्तनाच्या (Misconduct in Public Office) संशयावरून प्रिन्स अँड्र्यू यांना पोलिसांनी ताब्यात घेतले होते. युरो न्यूजच्या वृत्तानुसार, बर्कशायर आणि नॉरफोक येथील काही ठिकाणी पोलिसांनी छापेमारी करत साठीतल्या एका व्यक्तीला अटक केली होती.
अटकेनंतर काही तासांतच संबंधित व्यक्तीला चौकशीअंतर्गत सोडण्यात आल्याची माहिती पोलिसांनी दिली. अधिकृत निवेदनात अटक केलेल्या व्यक्तीचे नाव सुरुवातीला जाहीर करण्यात आले नव्हते, मात्र संध्याकाळी प्रिन्स अँड्र्यू पोलिस स्टेशनमधून बाहेर पडताना दिसल्यानंतर त्यांच्या अटकेची पुष्टी झाली. नॉरफोकमधील तपास पूर्ण झाला असून बर्कशायर येथील कारवाई सुरू असल्याचेही पोलिसांनी स्पष्ट केले.
हेही वाचा: Crime News: आई होण्याचं वय नव्हतं, पण...; त्या चिमुरडीची हृदयद्रावक कहाणी, नराधम मौलवीने केलं कोवळ्या जिवाचं आयुष्य उद्ध्वस्त
या घडामोडीनंतर ब्रिटनचे तिसरे राजा चार्ल्स (King Charles III) यांनी अत्यंत गंभीर प्रतिक्रिया देत “कायद्याला काम करू द्यावे” अशी भूमिका मांडली. अधिकृत निवेदनात त्यांनी या घटनेबाबत ‘गंभीर चिंता’ व्यक्त करत संपूर्ण तपास प्रक्रिया निष्पक्ष, पारदर्शक आणि कायदेशीर पद्धतीने पार पडावी, यावर भर दिला. बकिंगहॅम पॅलेस तपास यंत्रणांना पूर्ण सहकार्य करेल, असेही त्यांनी स्पष्ट केले.
राजा चार्ल्स यांनी पुढे सांगितले की, न्यायप्रक्रिया सुरू असताना कोणतीही अतिरिक्त टिप्पणी करणे योग्य ठरणार नाही. तसेच राजघराणे त्यांच्या सार्वजनिक जबाबदाऱ्या आणि सेवाकार्य पूर्ववत सुरू ठेवेल, असेही त्यांनी नमूद केले. या प्रकरणामुळे ब्रिटिश राजसत्तेवर पुन्हा एकदा सार्वजनिक आणि राजकीय स्तरावर चर्चा सुरू झाली आहे.
दरम्यान, प्रिन्स अँड्र्यू यांनी यापूर्वी सर्व आरोप फेटाळून लावत जेफ्री एपस्टीन यांच्या कोणत्याही बेकायदेशीर कृत्यांची माहिती किंवा संशय कधीही घेतला नसल्याचे सांगितले होते. अमेरिकेच्या न्याय विभागाने (US Department of Justice) एपस्टीन प्रकरणाशी संबंधित अतिरिक्त कागदपत्रे सार्वजनिक केल्यानंतर या वादाला नव्याने उधाण आले होते. याच पार्श्वभूमीवर ऑक्टोबर महिन्यात राजा चार्ल्स यांनी अँड्र्यू यांचा ‘प्रिन्स’ हा अधिकृत किताब काढून घेतला होता तसेच विंडसर येथील त्यांच्या निवासस्थानाबाबतही कारवाईची प्रक्रिया सुरू केली होती.
सध्या या प्रकरणाकडे संपूर्ण जगाचे लक्ष लागले असून ब्रिटनच्या राजघराण्याच्या प्रतिमा, पारदर्शकता आणि जबाबदारीबाबत नव्याने प्रश्न उपस्थित होत आहेत. पुढील तपास आणि न्यायालयीन प्रक्रियेनंतरच या प्रकरणाचे खरे स्वरूप स्पष्ट होणार असल्याचे निरीक्षकांचे मत आहे.
हेही वाचा: Maharashtra Weather Today: फेब्रुवारीतच मे महिन्याचा तडाका! राज्यात 'या' तारखेपासून सूर्य आग ओकणार; पाहा हवामान अंदाज