वॉशिंग्टन: अमेरिकेचे राष्ट्राध्यक्ष डोनाल्ड ट्रम्प यांनी एक महत्त्वाचा आर्थिक निर्णय घेत बीफ, कॉफी आणि उष्णकटिबंधीय फळांसह अनेक वस्तूंवरील आयात शुल्क रद्द केले. वाढत्या किंमतींमुळे ग्राहकांमध्ये नाराजी वाढत असताना हा निर्णय घेण्यात आला. हा निर्णय अशा वेळी आला आहे, जेव्हा महिन्याच्या सुरुवातीला झालेल्या निवडणुकांमध्ये मतदारांनी आर्थिक ताण आणि महागाई हीच सर्वात मोठी चिंता असल्याचे स्पष्टपणे सांगितले. या नाराजीचा परिणाम म्हणून व्हर्जिनिया आणि न्यू जर्सीमध्ये डेमोक्रॅट पक्षाला मोठे यश मिळाले.
ट्रम्प प्रशासनाने एप्रिल महिन्यात अनेक देशांवर मोठ्या प्रमाणात आयात शुल्क लादले होते. त्या वेळी ट्रम्प यांनी असा दावा केला होता की या शुल्कवाढीमुळे ग्राहकांच्या किंमतीत वाढ होत नाही. मात्र प्रत्यक्ष आर्थिक आकडेवारीने वेगळे चित्र दाखवले. विशेषतः बीफचे दर अमेरिकेत ऐतिहासिक उंचीवर पोहोचल्याने सर्वसामान्य ग्राहकांचे बजेट बिघडले. ब्राझीलसारख्या मोठ्या बीफ निर्यातदार देशांवरील शुल्कवाढही किंमतवाढीचे मोठे कारण ठरली.
हेही वाचा: DPDP Rules 2025: तुमचा डेटा, तुमचा हक्क!; सरकारच्या 'या' नव्या नियमांनी डिजिटल गोपनीयतेला मिळाले नवे कवच
नवीन आदेशानुसार बीफ आणि कॉफीसह चहा, फळरस, कोको, मसाले, केळी, संत्री, टोमॅटो आणि काही खतांवरील शुल्क पूर्णपणे हटवण्यात आले आहे. यातील अनेक वस्तू अमेरिकेत तयारच होत नाहीत. ट्रम्प यांनी सांगितले की इक्वेडोर, ग्वाटेमाला, एल साल्वादोर आणि अर्जेंटिना या देशांसोबत झालेले नवे कृषी-विषयक करार आयात शुल्क कमी करण्यास मदत करणारे ठरले. त्यामुळे या देशांतील कृषी उत्पादने अमेरिकन बाजारात अधिक स्वस्तात उपलब्ध होऊ शकतील.
ट्रम्प यांनी काही दिवसांपूर्वीच संकेत दिले होते की कॉफीवरील शुल्क कमी करण्यात येणार आहे, जेणेकरून तिची आयात वाढेल. अखेर हा निर्णय औपचारिकरित्या लागू करत त्यांनी वाढती महागाई आटोक्यात आणण्यासाठी ठोस पाऊल उचलले आहे.
हेही वाचा: PM Kisan Yojana: बिहारमधील दणदणीत विजयाचे सेलिब्रेशन ऑन मोडवर! शेतकऱ्यांसाठी पंतप्रधानांकडून खास गिफ्ट