हवेत 24 हजार फुटांवर विमानात हायजॅकिंगचा मेसेज! विमान माघारी फिरवत आपात्कालीन लँडिंग; संशयित प्रवासी ताब्यात

Flight Emergency Landing after United Airlines Hijack Threat: लास वेगासहून न्यू यॉर्कच्या नेवार्क विमानतळाकडे जाणाऱ्या युनायटेड एअरलाइन्सच्या ‘फ्लाइट 1681’ या विमानात एका प्रवाशाच्या मोबाईलवर हायजॅकिंगचा संशयास्पद मेसेज आढळल्याने हवेतच प्रचंड खळबळ उडाली. हॅरी रीड आंतरराष्ट्रीय विमानतळावरून रात्री 10 वाजून 51 मिनिटांनी उड्डाण घेतलेल्या बोईंग 737 मॅक्स 8 या विमानाने सुमारे 24 हजार फूट उंची गाठली असताना एका कर्मचाऱ्याचे लक्ष प्रवाशाच्या मोबाईलवरील संदेशाकडे गेले. ही बाब लक्षात येताच कर्मचाऱ्याने क्षणाचाही विलंब न लावता कॉकपिटमधील वैमानिकाला तात्काळ सतर्क केले. सुरक्षेची खबरदारी म्हणून 24 ऑक्टोबर रोजी उड्डाणानंतर काही वेळातच विमानाने माघारी फिरत लास वेगास विमानतळावर सुरक्षितपणे लँडिंग केले असून, एका मुख्य संशयित प्रवाशाला हातकड्या घालून ताब्यात घेण्यात आले आहे. या घटनेचे सविस्तर वृत्त एका आंतरराष्ट्रीय वृत्तसंस्थेने दिले आहे.

आपत्कालीन ट्रान्सपाँडर कोड 7700 प्रसारित; कॉकपिटचे दरवाजे सुरक्षेसाठी बंद
संभाव्य धोका आणि हायजॅकिंगची शक्यता टाळण्यासाठी विमानाच्या कर्मचाऱ्यांनी तातडीने कॉकपिटचे दरवाजे आतून सुरक्षितपणे बंद केले. त्याचवेळी, वैमानिकाने आणीबाणीची परिस्थिती दर्शवणारा ‘7700’ हा ट्रान्सपाँडर कोड हवाई वाहतूक नियंत्रण कक्षाला (ATC) तातडीने प्रसारित केला. या आपत्कालीन सिग्नलमुळे हवाई वाहतूक नियंत्रण कक्षाने इतर सर्व विमानांना बाजूला करत या प्रवासाला प्राधान्याने लँडिंग करण्याची परवानगी दिली.

हेही वाचा – हवाई दलाच्या दोन विमानांची हवेतच भीषण धडक! सराव उड्डाणादरम्यान 4 वैमानिक…

इंधनाचे वजन कमी करण्यासाठी हवेत घिरट्या; अखेर सुरक्षित लँडिंग
नेवार्कपर्यंतच्या लांब पल्ल्याच्या प्रवासासाठी विमानात मोठ्या प्रमाणावर इंधन भरण्यात आले होते. बोईंग 737 मॅक्स 8 या प्रकारच्या विमानात हवेत इंधन बाहेर काढून टाकण्याची (Fuel Jettison) सोय उपलब्ध नसल्याने, सुरक्षित उतरण्यासाठी लागणाऱ्या निर्धारित वजन मर्यादेत येण्यासाठी विमानाला काही वेळ हवेतच घिरट्या घालाव्या लागल्या. त्यानंतर वैमानिकाने अत्यंत कौशल्याने धावपट्टीची पूर्ण लांबी वापरत लास वेगास विमानतळावर विमानाचे सुरक्षित लँडिंग घडवून आणले.

प्रवाशांमध्ये भीती टाळण्यासाठी वेगळा बनाव; सुरक्षा यंत्रणांकडून कसून चौकशी सुरू
विमानातील प्रवाशांमध्ये घबराट किंवा भीतीचे वातावरण निर्माण होऊ नये यासाठी त्यांना हायजॅकिंगच्या धोक्याबाबत कोणतीही थेट माहिती देण्यात आली नव्हती. विमानात चुकीच्या पद्धतीने चढलेली किंवा तिकीट नसलेली व्यक्ती असल्याचा बनाव रचून प्रवाशांना शांत ठेवण्यात आले. विमान सुरक्षित जमिनीवर उतरताच स्थानिक सुरक्षा यंत्रणांनी आणि पोलिसांनी विमानात प्रवेश करून तपासणी केली आणि एका मुख्य संशयित प्रवाशाला हातकड्या ठोकून ताब्यात घेतले, तर अन्य दोन संशयितांना प्राथमिक चौकशीनंतर सोडून देण्यात आले. या धक्कादायक घटनेमुळे विमान प्रवासादरम्यानच्या सुरक्षेचा मुद्दा पुन्हा एकदा ऐरणीवर आला असून पोलीस संपूर्ण प्रकरणाचा कसून तपास करत आहेत.

हेही वाचा – अंत्यविधीवरून परतणाऱ्या प्रवाशांवर काळाचा घाला! बस आणि ट्रकच्या धडकेत 22 जणांचा मृत्यू, अनेक जखमी