Peace Agreement in Gaza Fall Apart : गेल्या दोन वर्षांपासून सुरू असलेल्या इस्रायल आणि हमास यांच्यातील संघर्षावर तोडगा काढण्यासाठी शांतता कराराच्या प्रस्तावाला दोन्ही बाजूंनी मंजुरी दिली आहे. या महत्त्वपूर्ण करारामुळे रक्तरंजित संघर्ष थांबणार असल्याची आशा निर्माण झाली असतानाच, आता एक गंभीर आणि धक्कादायक माहिती समोर आली आहे.
अमेरिकेच्या परराष्ट्र विभागाने एक मोठा दावा केला आहे. त्यांना एक विश्वसनीय अहवाल प्राप्त झाला आहे, ज्यानुसार हमास गाझा पट्टीत पॅलेस्टिनी नागरिकांवर हल्ला करण्याची योजना आखत असल्याचा दावा अमेरिकेने केला आहे. जर हमासने असे पाऊल उचलले, तर ते युद्धविरामाचे गंभीर उल्लंघन ठरेल, असा इशारा अमेरिकेने दिला आहे. यासंदर्भातील वृत्त एका वृत्तसंस्थेने दिले आहे.
अमेरिकेच्या परराष्ट्र विभागाने एका निवेदनात स्पष्ट केले आहे की, “पॅलेस्टिनी नागरिकांवर होणारा हा नियोजित हल्ला युद्धबंदी कराराचे थेट आणि गंभीर उल्लंघन ठरेल. तसेच, मध्यस्थांच्या प्रयत्नातून मिळालेल्या महत्त्वपूर्ण शांतता कराराच्या प्रगतीला मोठा धक्का बसेल.” अमेरिकेने पुढे इशारा दिला, “जर हमासने हा हल्ला केला, तर गाझाच्या लोकांचे संरक्षण करण्यासाठी आणि युद्धबंदीची अखंडता जपण्यासाठी तातडीने उपाययोजना केल्या जातील.” या उपाययोजना नेमक्या काय असतील, याबद्दल मात्र निवेदनात अधिक तपशील देण्यात आलेला नाही.
हेही वाचा - USA No Kings Protest: अमेरिकेत ‘नो किंग्ज’ आंदोलनाने ट्रम्प प्रशासनाला आव्हान; ५० राज्यांत नागरिक रस्त्यावर
दरम्यान, गेल्या आठवड्यात राष्ट्राध्यक्ष डोनाल्ड ट्रम्प यांनी हमासला कडक शब्दांत इशारा दिला होता. ट्रम्प यांनी त्यांच्या ट्रुथ सोशल मीडियावरील पोस्टमधून इशारा दिला होता की, “जर हमास गाझामध्ये हल्ला करत राहिला, तर शांतता कराराचे उल्लंघन समजून आमच्याकडे आत जाऊन त्यांना मारण्याशिवाय पर्याय राहणार नाही.”
युद्धबंदी कराराचा पहिला टप्पा कसा काम करतोय?
गेल्या आठवड्यात हमास आणि इस्रायलमध्ये टप्प्याटप्प्याने शांतता करार निश्चित झाला आहे. या करारानुसार, इस्रायलने 7 ऑक्टोबर 2023 रोजी झालेल्या हल्ल्यानंतर पॅलेस्टिनी गटाच्या ताब्यात असलेल्या ओलिसांची सुटका करण्याच्या बदल्यात गाझामधील लष्करी हल्ले थांबवले आहेत. कराराचा पहिला टप्पा सुरू झाला असून, यामध्ये जिवंत ओलिसांची सुटका आणि मृतांचे अवशेष परत करण्याचा समावेश आहे. या करारानुसार, हमास आणि इस्रायलने एकमेकांच्या काही ओलिसांची सुटका केली आहे.
हेही वाचा - China - India Relations: ट्रम्प यांची चिंता वाढली, चीनची भारतासोबत जवळीक, घेतला महत्वपूर्ण निर्णय