Countries Without Military: प्रत्येक देशासाठी आपल्या सीमेचे रक्षण करण्यासाठी एक मजबूत सैन्य असणे हे जवळपास एक अनिवार्य बाब आहे. परंतु तुम्हाला माहीत आहे का, की याच जगात अशी अनेक राष्ट्रे आहेत जिथे सरकार आहे, लोक आहेत आणि जमीनही आहे, पण त्यांचे स्वतःचे सैन्य नाही. मग या देशांचे रक्षण कोण करते? आज आपण अशाच 5 प्रमुख देशांबद्दल माहिती घेऊया.
1. व्हॅटिकन सिटी (Vatican City): जगातील सर्वात लहान देश म्हणजे व्हॅटिकन सिटी. रोम शहराच्या आत असलेल्या या देशात पोपचे वर्चस्व आहे. स्वतंत्र राष्ट्र असूनही, या देशाकडे स्वतःचे सैन्य नाही. व्हॅटिकन सिटीच्या सुरक्षेची जबाबदारी इटली देश सांभाळतो. या देशात असलेले स्विस गार्ड फक्त पोपचे वैयक्तिक संरक्षण आणि अन्य औपचारिक भूमिका पार पाडतात.
2. मोनाको (Monaco): युरोपमध्ये स्थित मोनाको हे एक लहान स्वतंत्र शहर-राज्य (सिटी-स्टेट) आहे. हे भूमध्य समुद्राच्या किनाऱ्यावर फ्रान्सच्या दक्षिणेकडील किनार्यावर वसलेले असून, फ्रान्सच्या सीमेने वेढलेले आहे. फक्त सुमारे 2.02 चौरस किलोमीटर क्षेत्रफळ असलेला हा देश आपली विलासिता, कॅसिनो आणि फॉर्म्युला 1 ग्रांड प्रिक्स शर्यतीसाठी प्रसिद्ध आहे. या देशाकडेही आपले स्वतःचे सैन्य नाही. येथील सुरक्षेची जबाबदारी फ्रेंच सैन्य (French Army) उचलते.
हेही वाचा - Earthquake In Indonesia: इंडोनेशियाच्या पापुआ प्रांतात 6.7 तीव्रतेचा भूकंप; कोणतीही जीवितहानी नाही
3. कोस्टा रिका (Costa Rica): मध्य अमेरिकेत असलेला कोस्टा रिका हा उत्तरेला निकाराग्वा आणि आग्नेयेला पनामा या देशांनी वेढलेला आहे. सुमारे 51,100 चौरस किलोमीटर क्षेत्रफळ असलेल्या या देशाकडे 1949 पर्यंत स्वतःचे सैन्य होते. मात्र, त्याच वर्षी झालेल्या भीषण गृहयुद्धानंतर या देशाने आपली मिलिट्री बरखास्त केली. कोस्टा रिका आपल्या सुरक्षेसाठी पोलीस दलावर आणि विविध आंतरराष्ट्रीय करारांवर अवलंबून आहे.
4. किरिबाती (Kiribati): किरिबाती हा प्रशांत महासागरात स्थित एक बेटांचा देश आहे. हा देश मायक्रोनेशिया आणि पॉलिनेशियाच्या मध्यभागी येतो. सुमारे 33 प्रवाळ बेटे (Coral Islands) आणि एका उंच बेटाने बनलेल्या या देशाचे एकूण क्षेत्रफळ सुमारे 811 चौरस किलोमीटर आहे. किरिबातीकडे एक छोटे पोलीस दल असले तरी, स्वतःचे सैन्य नाही. सुरक्षेसाठी हा देश पूर्णपणे ऑस्ट्रेलिया आणि न्यूझीलंड या राष्ट्रांवर अवलंबून आहे.
5. ग्रेनाडा (Grenada): कॅरिबियन समुद्रात स्थित ग्रेनाडा हे देखील एक बेटांचे राष्ट्र आहे. या देशातील अंतर्गत सुरक्षा आणि कायदा व सुव्यवस्था रॉयल ग्रेनाडा पोलीस दल (Royal Grenada Police Force) सांभाळते. या दलात फक्त 940 कर्मचारी असून, ते गुन्हेगारी नियंत्रण, इमिग्रेशन, सागरी कायदा, बंदर सुरक्षा आणि अग्निशमन सेवांसारखी कामे करतात. ग्रेनाडाकडे स्पेशल सर्विसेज युनिट (SSU) नावाची एक पॅरा-मिलिट्री युनिट देखील आहे, जी राष्ट्रीय संरक्षण आणि आपत्कालीन परिस्थितीत मदत करते. मात्र, या देशाकडे स्थायी सैन्य नाही. बाह्य सुरक्षेसाठी ग्रेनाडा रिजनल सिक्युरिटी सिस्टम (RSS) या गटावर अवलंबून आहे, ज्यात इतर कॅरिबियन देशांचा सहभाग आहे.
हेही वाचा - Donald Trump : डोनाल्ड ट्रम्प यांचा नवा दावा; “मोदींनी खात्री दिलीय, भारत रशियाकडून तेल खरेदी थांबवेल”