लग्नात 45 लाखांचा खर्च, तरीही हुंड्याची मागणी सुरूच; पुण्यात IT इंजिनिअर महिलेने उचललं टोकाचं पाऊल

पुणे : उंड्री-वडाचीवाडी परिसरात 23 वर्षीय विवाहित IT इंजिनियर महिलेचा राहत्या घरी मृत्यू झाल्याची घटना समोर आली आहे. वैष्णवी ओंकार घिसरे असे मृत महिलेचे नाव आहे. तिच्या मृत्यूप्रकरणी पतीसह सासू-सासऱ्यांविरोधात काळेपडळ पोलीस ठाण्यात गुन्हा दाखल करण्यात आला आहे. माहेरच्या कुटुंबीयांनी हुंड्यासाठी छळ केल्याचा गंभीर आरोप केला असून, या आरोपांची पोलिसांकडून चौकशी सुरू आहे.

मिळालेल्या माहितीनुसार, वैष्णवीचा विवाह  9 मे 2026 रोजी ओंकार संजय घिसरे याच्याशी झाला होता. विवाहावेळी तिच्या कुटुंबीयांनी सुमारे 45 लाख रुपये खर्च केल्याचे आणि 10 तोळे सोने दिल्याचे तक्रारीत नमूद करण्यात आले आहे. त्यानंतर चारचाकी वाहन खरेदीसाठी माहेरहून आणखी पाच लाख रुपये आणण्याची मागणी करण्यात आल्याचा आरोप कुटुंबीयांनी केला आहे.

हेही वाचा:Amravati Ashram School News : अचानक छातीत वेदना, रुग्णालयात दाखल केले, पण…; अमरावतीच्या आश्रमशाळेतील 11 वर्षीय विद्यार्थिनीचा मृत्यू

विवाहानंतर काही काळ वैष्णवी सासरी राहिली. त्यानंतर नोकरीनिमित्त ती बंगळुरू येथे गेली होती. जून महिन्याच्या अखेरीस ती पुण्यातील सासरी परतली आणि घरूनच IT कंपनीचे काम करत होती. या काळात पती, सासू आणि सासऱ्यांकडून मानसिक तसेच शारीरिक त्रास दिला जात असल्याचा आरोप तिच्या कुटुंबीयांनी पोलिसांकडे केलेल्या तक्रारीत केला आहे.

कुटुंबीयांच्या म्हणण्यानुसार, 24 सप्टेंबरच्या रात्री वैष्णवीने आईशी फोनवर संपर्क साधला होता. यावेळी तिने सासरी होत असलेल्या त्रासाबाबत माहिती दिल्याचा दावा तक्रारीत करण्यात आला आहे. त्याच रात्री साडेअकराच्या सुमारास तिच्या पतीनेही माहेरच्या कुटुंबीयांशी फोनवर संपर्क साधल्याचे त्यांनी सांगितले.

हेही वाचा: Belapur ST Bus Accident : बेलापूरमध्ये एस टी बसचा भीषण अपघात! तीन रिक्षा आणि तीन कारला जोरदार धडक; 8 ते 9 जखमी

यानंतर वैष्णवीशी संपर्क होऊ न शकल्याने तिचे आई-वडील पुण्यात आले. त्यानंतर तिचा राहत्या घरी मृत्यू झाल्याचे समोर आले. पोलिसांनी तिच्या वडिलांच्या फिर्यादीवरून पती ओंकार घिसरे याच्यासह सासू-सासऱ्यांविरोधात गुन्हा दाखल केला आहे. संबंधितांवर हुंडा प्रतिबंधक कायदा आणि आत्महत्येस प्रवृत्त केल्याच्या आरोपांनुसार कारवाई करण्यात आली आहे.

या प्रकरणातील तिन्ही आरोपींना पोलिसांनी अटक केल्याची माहितीही समोर आली आहे. मात्र, कुटुंबीयांनी केलेले आरोप तपासातून सिद्ध होणे बाकी आहे. वैष्णवीच्या मृत्यूमागील नेमकी परिस्थिती, कथित हुंड्याची मागणी आणि छळाच्या आरोपांबाबत काळेपडळ पोलीस अधिक तपास करत आहेत. तपास पूर्ण झाल्यानंतर प्रकरणातील वस्तुस्थिती अधिक स्पष्ट होणार आहे.