Palwal Contaminated Water Deaths : हरियाणाच्या पलवल जिल्ह्यातील चायंसा गावात गेल्या 15 दिवसांत दूषित पिण्याच्या पाण्यामुळे खळबळ उडाली आहे. येथे संसर्गजन्य रोगांच्या प्रसारामुळे 5 बालकांसह आतापर्यंत 12 लोकांचा मृत्यू झाला असून, यामुळे संपूर्ण राज्यात भीतीचे वातावरण पसरले आहे. आरोग्य विभागाने या प्रकरणाची गंभीर दखल घेत तातडीने तपास सुरू केला आहे.
कावीळ आणि यकृताच्या विकारांमुळे मृत्यू
चायंसा गावात 31 जानेवारी 2026 रोजी काविळीशी संबंधित मृत्यूची पहिली घटना समोर आली होती. त्यानंतर 27 जानेवारी ते 11 फेब्रुवारी या काळात मृतांचा आकडा वेगाने वाढला. मृतांमध्ये 9 ते 65 वर्षे वयोगटातील लोकांचा समावेश आहे. मृतांपैकी चौघांचा मृत्यू 'अॅक्यूट हिपॅटायटीस' किंवा 'लिव्हर फेल्युअर'मुळे (यकृत निकामी होणे) झाला आहे. रुग्णांना सुरुवातीला ताप, पोटदुखी, उलट्या आणि काविळीची लक्षणे जाणवली होती.
तपासणीत धक्कादायक वास्तव समोर
पलवलच्या मुख्य वैद्यकीय अधिकारी सतिंदर वशिष्ठ यांनी दिलेल्या माहितीनुसार, आतापर्यंत सुमारे 1,500 लोकांची स्क्रीनिंग करण्यात आली आहे. जवळपास 800 लोकांवर ओपीडीमध्ये उपचार झाले असून त्यांचे रक्ताचे नमुने हिपॅटायटीस A, B, C आणि E साठी तपासले गेले. रक्ताच्या विश्लेषणामध्ये हिपॅटायटीस B चे 2 आणि हिपॅटायटीस C चे 9 रुग्ण आढळले आहेत. धक्कादायक म्हणजे, घराघरातून घेतलेल्या 107 पाण्याच्या नमुन्यांपैकी 23 नमुने चाचणीत नापास झाले आहेत, ज्यामध्ये हानिकारक बॅक्टेरिया आणि क्लोरीनचा अभाव दिसून आला आहे.
हेही वाचा - Inflation Rate : सर्वसामान्यांना महागाईच्या झळा, होलसेल बाजारात महागाईत सलग तिसऱ्या महिन्यात वाढ
पाणी साठवणुकीच्या पद्धतींवर प्रश्नचिन्ह
चायंसा गावाची लोकसंख्या 5,700 असून येथे सुमारे 865 कुटुंबे राहतात. येथील नागरिक प्रामुख्याने भूमिगत साठवण टाक्या आणि टँकरच्या पाण्यावर अवलंबून आहेत. स्टोरेज टाक्यांमध्ये 'कॉलिफॉर्म बॅक्टेरिया' आढळले असून अनियमित पाणीपुरवठा आणि अपुऱ्या क्लोरीनेशनमुळे जलजन्य रोगांचा धोका वाढला आहे. काही ठिकाणी रिव्हर्स ऑस्मोसिस (RO) प्रक्रिया केलेले पाणी शेजारच्या भागातून आणले जात आहे, मात्र साठवणुकीच्या चुकीच्या पद्धतींमुळे तेही दूषित होत असल्याचे समोर आले आहे.
प्रशासनाचे प्रतिबंधात्मक उपाय
या घटनेनंतर आरोग्य विभागाने गावात वैद्यकीय शिबिरे आणि घरोघरी सर्वेक्षण सुरू केले आहे. प्रतिबंधात्मक उपाय म्हणून सुमारे 15,000 हॅलोजन टॅब्लेटचे (पाणी शुद्धीकरणाच्या गोळ्या) वाटप करण्यात आले आहे. तसेच, नागरिकांच्या मदतीसाठी 01275-240022 हा हेल्पलाईन क्रमांक जाहीर करण्यात आला आहे. मध्य प्रदेशातील इंदूरमध्ये गेल्या महिन्यात दूषित पाण्यामुळे झालेल्या 16 मृत्यूंच्या पार्श्वभूमीवर, पलवलमधील ही घटना देशातील पिण्याच्या पाण्याच्या सुरक्षेबाबत गंभीर प्रश्न निर्माण करणारी ठरली आहे.
हेही वाचा - Gold Locker Fraud: ज्यांच्या हाती तिजोरीच्या चाव्या, त्यांनीच केला विश्वासघात; तब्बल साडेतीन कोटींचे सोने बँकेच्या लॉकरमधून लंपास, काय आणि कसं घडलं नेमकं?