पटना: बिहार विधानसभेच्या आगामी निवडणुकांसाठी प्रचार मोहीमेला आज अधिकृत सुरुवात होणार असून, पंतप्रधान नरेंद्र मोदी कर्पूरी ठाकूर यांच्या गावातून एनडीएचा प्रचार ध्वज फडकवणार आहेत. मागासवर्गीय समाज आणि मिथिलांचलमधील 37 टक्के मतदारवर्गाला साधण्यावर या सभेचा मुख्य भर असेल. भारतरत्न आणि जननायक माजी मुख्यमंत्री दिवंगत कर्पूरी ठाकूर यांच्या जन्मगावातूनच पंतप्रधान निवडणुकीचे रणशिंग फुंकणार आहेत.
पंतप्रधानांची पहिली सभा दुपारी 1 वाजता कर्पूरीग्राममध्ये आणि दुसरी सभा 2 वाजता बेगूसरायच्या विमानतळ मैदानावर होणार आहे. पंतप्रधान मोदी सर्वप्रथम कर्पूरी ठाकूर यांच्या पुतळ्याला पुष्पहार अर्पण करून त्यांना अभिवादन करतील. त्यानंतर ते राष्ट्रकवी रामधारी सिंह दिनकर यांच्या जिल्ह्यातील बेगूसराय येथे दुसरी सभा घेतील. दोन्ही सभांमध्ये एनडीएकडून प्रत्येकी 10 विधानसभा मतदारसंघांचे उमेदवार मंचावर उपस्थित राहतील. या कार्यक्रमांना मुख्यमंत्री नीतीशकुमार, उपमुख्यमंत्री सम्राट चौधरी आणि विजय सिन्हा यांच्यासह एनडीएतील सर्व प्रमुख नेते उपस्थित राहून मतदारांना संबोधित करतील.
हेही वाचा: Chandrashekhar Bawankule: सर्वांचे मोबाईल आणि व्हॉट्सअॅप..., महसूल मंत्री बावनकुळेंचं खळबळजनक वक्तव्य
जेडीयूचे राष्ट्रीय कार्यकारी अध्यक्ष संजय झा आणि केंद्रीय मंत्री चिराग पासवान, हमचे नेते जीतनराम मांझी आणि उपेंद्र कुशवाहा हे सर्व नेते एनडीए उमेदवारांच्या विजयासाठी जनतेकडे आवाहन करणार आहेत.
एनडीएच्या सूत्रांनुसार, पंतप्रधान मोदींच्या सभांमुळे कार्यकर्त्यांमध्ये नवचैतन्य निर्माण होईल आणि मतदारांमध्ये थेट संवाद प्रस्थापित होईल. त्यांचे भाषण एनडीएच्या प्रचाराला निर्णायक वळण देईल, असा विश्वास व्यक्त करण्यात येत आहे.
मिथिलांचलचा राजकीय अर्थ
मिथिलांचल प्रदेश एनडीएसाठी सामाजिक आणि राजकीय दृष्ट्या निर्णायक मानला जातो. 2020 च्या विधानसभा निवडणुकीत एनडीएला या भागात अपेक्षित यश मिळाले नव्हते. त्यामुळे या वर्षीचा प्रचार आराखडा अधिक संघटित आणि लक्ष्यित ठेवण्यात आला आहे. सध्या समस्तीपूर जिल्ह्यातील काही जागांवर एनडीएचा प्रभाव मर्यादित असून, बेगूसरायमधील सात पैकी केवळ तीन जागांवरच एनडीएचे आमदार आहेत. त्यामुळे या दौऱ्याद्वारे गमावलेली मते परत मिळवणे आणि मतदारसंघांमध्ये विश्वास निर्माण करणे हे प्रमुख उद्दिष्ट आहे.
अमित शाह यांच्याही सभा आज
दरम्यान, केंद्रीय गृहमंत्री अमित शाह आज बिहारमध्ये दोन निवडणूक सभा घेणार आहेत. पहिली सभा सिवान येथे, तर दुसरी बक्सर विधानसभा क्षेत्रात होईल. सिवानमधून आरोग्यमंत्री मंगल पांडे आणि बक्सरमधून आनंद मिश्रा हे भाजपाचे उमेदवार म्हणून मैदानात आहेत. दोघेही पहिल्यांदाच विधानसभा निवडणूक लढवत असून, पक्षाच्या या दोन्ही जागांवर विशेष लक्ष केंद्रित केले आहे.
एनडीएचा हा संयुक्त प्रचार आरंभ बिहारमधील निवडणूक समीकरणांना नवे वळण देणार असल्याचे राजकीय तज्ज्ञांचे मत आहे.
हेही वाचा: New Nomination Rules: ग्राहकांसाठी मोठा दिलासा! 1 नोव्हेंबरपासून नॉमिनी सिस्टममध्ये मोठा बदल