गुजरातच्या बनासकांठा जिल्ह्यात पहाटे भीषण रस्ता अपघात झाला. अमीरगढजवळील इकबालगढ राष्ट्रीय महामार्गावर ट्रक आणि इनोव्हा कारची समोरासमोर जोरदार धडक होऊन सहा जणांचा मृत्यू झाला, तर तीन जण गंभीर जखमी झाले आहेत. अपघात इतका भीषण होता की इनोव्हा कार पूर्णपणे चक्काचूर होऊन पलटी झाली आहे.
प्राथमिक माहितीनुसार, ट्रक चुकीच्या दिशेने आणि वेगात येत होता. याच ट्रकने समोरून येणाऱ्या इनोव्हाला जोरदार धडक दिली. या दुर्घटनेत पाच जणांचा जागीच मृत्यू झाला, तर एका जखमी व्यक्तीचा बचावानंतर काही वेळातच मृत्यू झाला. अपघातानंतर महामार्गावर काही काळ भीतीचे वातावरण निर्माण झाले होते.
प्रत्यक्षदर्शींनी सांगितले की, अपघाताच्या वेळी मोठा आवाज झाला. आवाज ऐकताच आसपासच्या वाहनचालकांनी घटनास्थळी धाव घेतली आणि तत्काळ पोलिस व आपत्कालीन यंत्रणांना माहिती दिली. घटनेची माहिती मिळताच आपत्कालीन वैद्यकीय पथक आणि अमीरगढ पोलीस तातडीने घटनास्थळी दाखल झाले.
हेही वाचा: Maharashtra Weather Update: हुडहुडी गायब, उकाडा वाढला; महाराष्ट्रात निसर्गाचे 'अजब' रूप; थंडीच्या महिन्यात पावसाचे सावट
पोलीस आणि बचाव पथकाने गंभीर जखमी असलेल्या तीन जणांना त्वरित रुग्णालयात दाखल केले. मृतदेह यंत्रसामग्रीच्या मदतीने वाहनातून बाहेर काढून शवविच्छेदनासाठी पाठवण्यात आले. अपघातानंतर काही काळ महामार्गावर वाहतूक ठप्प झाली होती आणि मलबा हटवल्यानंतर वाहतूक सुरळीत करण्यात आली.
या अपघातानंतर ट्रक चालक घटनास्थळावरून फरार झाल्याची माहिती पोलिसांनी दिली आहे. आरोपी चालकाचा शोध घेण्यासाठी विशेष पथके तयार करण्यात आली असून, त्याच्याविरोधात गुन्हा दाखल करण्याची प्रक्रिया सुरू आहे. अपघाताची नेमकी कारणे, ट्रकचा वेग आणि दिशा यांचा तपास केला जात आहे.
स्थानिक नागरिकांनी या घटनेनंतर संताप व्यक्त करत महामार्गावरील वाहतूक नियमांची कडक अंमलबजावणी करण्याची मागणी केली आहे. या भागात जड वाहनांकडून चुकीच्या दिशेने वाहन चालवण्याचे प्रकार वारंवार घडत असल्याचे स्थानिकांचे म्हणणे आहे. भविष्यात अशा दुर्घटना टाळण्यासाठी प्रशासनाने तातडीने उपाययोजना कराव्यात, अशी मागणी नागरिकांकडून करण्यात येत आहे.
हेही वाचा: CJI Suryakant: 'न्याय उशिरा मिळणे म्हणजे अन्याय नव्हे, न्यायाचाच...'; सरन्यायाधीश सूर्यकांत यांचा गंभीर इशारा