Human Coronavirus HKU1 Detected In Kolkata: गेल्या काही वर्षांपासून देशात आणि परदेशात अनेक प्रकारच्या विषाणूंचा प्रादुर्भाव दिसून येत आहे. आता आणखी एका नवीन विषाणूमुळे देशात चिंता वाढली आहे. मीडिया रिपोर्ट्सनुसार, कोलकाता येथील एका 45 वर्षीय महिलेमध्ये HKU1 विषाणू आढळून आला आहे. गेल्या 15 दिवसांपासून महिलेला ताप, खोकला आणि सर्दी अशी लक्षण होती. तथापि, तपासणीनंतर महिलेला HKU1 विषाणूची लागण झाल्याचे स्पष्ट झाले. यानंतर, महिलेवर दक्षिण कोलकाता येथील एका खाजगी रुग्णालयात उपचार सुरू आहेत. HKU1 म्हणजे काय? HKU1 विषाणूची लक्षणे कोणती? ते जाणून घेऊयात…
HKU1 विषाणू म्हणजे काय?
आरोग्य तज्ञांच्या मते, मानवी कोरोनाव्हायरस HKU1 (HCoV-HKU1) हा बीटा कोरोनाव्हायरस कुटुंबातील एक सदस्य आहे, ज्यामध्ये SARS आणि MERS विषाणू देखील समाविष्ट आहेत. HKU1 विषाणू सहसा सौम्य श्वसन संसर्गाशी संबंधित असतो. तसेच कधीकधी या विषाणूमुळे न्यूमोनिया किंवा ब्राँकायटिससारखे गंभीर फुफ्फुसांचे संक्रमण होऊ शकते. याशिवाय, हा विषाणू श्वसनसंस्थेच्या वरच्या भागावर परिणाम करू शकतो.
हेही वाचा – दैनंदिन जीवनात 'हा' घ्या पौष्टिक आहार
HKU1 विषाणूची लक्षणे कोणती?
सततचा खोकला
सर्दी किंवा नाक बंद होणे
घसा खवखवणे
ताप
शिंका येणे
थकवा
डोकेदुखी
दम लागणे
न्यूमोनिया किंवा ब्राँकायटिस
HKU1 विषाणू कसा पसरतो?
दरम्यान, आरोग्य तज्ञांच्या मते हा विषाणू संक्रमित व्यक्तीने शिंकताना किंवा खोकताना सोडलेल्या श्वसनाच्या थेंबांच्या संपर्कातून, दूषित पृष्ठभागांना स्पर्श केल्यानंतर तोंड, नाक किंवा डोळ्यांना स्पर्श केल्याने आणि संक्रमित व्यक्तीच्या जवळच्या संपर्कात आल्याने पसरू शकतो.
HKU1 विषाणू संक्रमण रोखण्यासाठी प्रतिबंधात्मक उपाय –
HKU1 विषाणू संक्रमण रोखण्यासाठी साबण आणि पाण्याने हात धुवा, गर्दीच्या ठिकाणी मास्क घाला, श्वसन संसर्गाची लक्षणे असलेल्या लोकांशी संपर्क टाळा. खोकताना किंवा शिंकताना तोंड आणि नाक झाका. निरोगी आहार घ्या. याशिवाय, हायड्रेटेड रहा आणि पुरेशी विश्रांती घ्या.
Disclaimer: ही माहिती केवळ सामान्य ज्ञानासाठी प्रदान केली आहे. जय महाराष्ट्र या माहितीची कोणतीही हमी देत नाही. आरोग्यविषयक कोणताही निर्णय घेण्यापूर्वी तज्ज्ञ किंवा डॉक्टरांचा सल्ला घ्या.
