हृदयद्रावक! भरधाव कारने मनरेगा कामगारांना चिरडलं; 8 मजुरांचा जागीच मृत्यू, संपूर्ण गावावर शोककळा

पंजाबमधील संगरूर जिल्ह्यात रविवारी एक अत्यंत हृदयद्रावक आणि मन हेलावून टाकणारी दुर्घटना घडली. संगरूरमधील लेहरागागा परिसरात रस्त्याच्या कडेने आपल्या कामावर जात असलेल्या महात्मा गांधी राष्ट्रीय ग्रामीण रोजगार हमी कायदा (MGNREGA) अंतर्गत काम करणाऱ्या मजुरांना एका बेदरकार कारचालकाने जोरदार धडक दिली. या भीषण रस्ते अपघातात तब्बल 8 कामगारांचा मृत्यू झाला. या दुर्घटनेमुळे संपूर्ण परिसरात एकच शोककळा पसरली असून, स्थानिक नागरिकांमधून तीव्र संताप व्यक्त होत आहे. घटनेची माहिती मिळताच पोलिसांनी तातडीने धाव घेत मदतकार्य सुरू केले.

सर्व मृत कामगार अलिशेर गावचे रहिवासी; चालकाची ओळख पटली

पोलिसांनी दिलेल्या प्राथमिक माहितीनुसार, या अपघातात प्राण गमावलेले सर्व 8 मजूर लेहरागागा जवळील अलिशेर या एकाच गावातील असल्याचे निष्पन्न झाले आहे. दुर्घटनेच्या वेळी जवळपास 25 मनरेगा कामगार आपल्या रोजंदारीच्या कामासाठी जात होते, त्याच वेळी भरधाव वेगाने आलेल्या एका शेवरले मॅग्नम कारने त्यांना चिरडले. या अपघातास कारणीभूत ठरलेल्या कारचालकाची ओळख पटली असून, तो रायधराणा गावचा रहिवासी असून त्याचे नाव परगट सिंग ऊर्फ ‘काला’ असल्याचे समोर आले आहे. घटनेनंतर चालक लगेच फरार झाला होता.

हेही वाचा – नूडल्स नव्हे तर, या कारणाने.. सामूहिक मृत्यू प्रकरणात मोठे वळण; मोबाईलमधील व्हॉइस नोटमुळे तिघे ताब्यात

मृतांच्या कुटुंबीयांवर शोककळा

या दुर्घटनेत जीव गमावलेल्या दुर्दैवी कामगारांमध्ये करमजीत कौर, जीवन सिंग, निक्की, सरबजीत कौर, रणजीत कौर, करमजीत (पत्नी काला खान), राणी कौर आणि देशराज यांचा समावेश आहे. सुरुवातीला काही जखमींना लेहरागागा येथील स्थानिक रुग्णालयात दाखल करण्यात आले होते, परंतु प्रकृती अत्यंत गंभीर असल्याने मृतांचा आकडा वाढून 8 वर पोहोचला. याप्रकरणी संगरूरचे पोलीस अधीक्षक (SP) पलविंदर चीमा यांनी सांगितले की, दोषी चालकाची ओळख पटली असून त्याला पकडण्यासाठी पोलिसांची पथके रवाना करण्यात आली आहेत. लवकरात लवकर आरोपीला बेड्या ठोकून कठोर कायदेशीर कारवाई केली जाईल, असे प्रशासनाकडून स्पष्ट करण्यात आले आहे.