नूडल्स नव्हे तर, या कारणाने.. सामूहिक मृत्यू प्रकरणात मोठे वळण; मोबाईलमधील व्हॉइस नोटमुळे तिघे ताब्यात

Greater Noida Noodles Poisoning Voice Note: उत्तर प्रदेशातील ग्रेटर नोएडा येथील रबुपुरा पोलीस ठाण्याच्या हद्दीत येणाऱ्या नगला श्री पदम गावातून एक अत्यंत मन हेलावून टाकणारी घटना समोर आली आहे. काही दिवसांपूर्वी एकाच कुटुंबातील महेश, त्यांची पत्नी ललिता आणि त्यांच्या तीन मुलांचे मृतदेह संशयास्पद स्थितीत घरात आढळल्यामुळे संपूर्ण परिसरात मोठी सनसनाटी पसरली होती. सुरुवातीला आदल्या रात्री खाल्लेल्या नूडल्स आणि चहामुळे विषबाधा झाल्याची प्राथमिक चर्चा होती. मात्र, एका वृत्तसंस्थेने दिलेल्या वृत्तानुसार, आता या प्रकरणाला मालमत्तेचा वाद आणि आत्महत्येचे नवे वळण मिळाले असून पोलीस सर्व बाजूने कसून तपास करत आहेत.

मृत महेशच्या मोबाईल फोनमध्ये सापडली महत्त्वाची व्हॉइस नोट
या संपूर्ण प्रकरणाचा तपास करत असताना पोलिसांनी मृत महेशच्या मोबाईल फोनची तपासणी केली, ज्यामध्ये एक अत्यंत महत्त्वाची ‘व्हॉइस नोट’ हाती लागली आहे. या ऑडिओ क्लिपमध्ये महेशने आपल्या दोन बहिणी आणि एका मेहुण्यामुळे कुटुंबाची अत्यंत बिकट परिस्थिती निर्माण झाल्याचा स्पष्ट उल्लेख केला आहे. या पुराव्याच्या आधारे महेशच्या दुसऱ्या मेहुण्याने पोलिस ठाण्यात अधिकृत तक्रार दाखल केली असून, संबंधित तिन्ही संशयितांकडून सातत्याने कुटुंबाचा मानसिक छळ केला जात असल्याचा गंभीर आरोप केला आहे. पोलिसांनी तातडीने कारवाई करत त्या तिन्ही संशयितांना ताब्यात घेतले आहे.

हेही वाचा – देवीची आरती करून घरी परतत होती, नराधमाने अंधारात ओढलं; 16 वर्षीय मुलीवर भररस्त्यात सपासप वार

शवविच्छेदनात विषबाधेची चिन्हे स्पष्ट
सुरुवातीला अन्नातून विषबाधा झाल्याचा संशय व्यक्त केला जात असला, तरी शवविच्छेदनादरम्यान (Autopsy) शरीरात विषबाधेची स्पष्ट चिन्हे आढळल्यामुळे डॉक्टरांनी पाचही जणांच्या अंतर्गत अवयवांचे नमुने (Viscera samples) फॉरेन्सिक तपासणीसाठी सुरक्षित ठेवले आहेत. हे सर्व नमुने आता फॉरेन्सिक प्रयोगशालात विश्लेषणासाठी पाठविण्यात आले असून, त्याचा अधिकृत अहवाल हाती आल्यानंतरच या सामूहिक मृत्यूचे खरे आणि नेमके कारण स्पष्ट होईल, असे पोलिसांनी स्पष्ट केले आहे. त्यामुळे केवळ नूडल्स खाल्ल्यामुळेच हे मृत्यू झाले असा निष्कर्ष काढणे सध्या घाईचे ठरेल.

मालमत्तेचा वाद आणि तीव्र मानसिक तणावातून…
पोलिसांच्या प्राथमिक अंदाजानुसार, बऱ्याच काळापासून सुरू असलेला संपत्तीचा किंवा मालमत्तेचा वाद यामागे असावा आणि याच तीव्र तणावाखाली येऊन या कुटुंबाने हे टोकाचे पाऊल उचलले असावे, अशी दाट शक्यता वर्तवली जात आहे. मात्र, हा मृत्यू नेमका घातपाताचा आहे की सामूहिक आत्महत्येचा, याचा उलगडा अद्याप झालेला नाही. ताब्यात घेण्यात आलेल्या तिघांची कसून चौकशी सुरू असून, फॉरेन्सिक अहवाल आल्यानंतर या गूढ प्रकरणाचा संपूर्ण पर्दाफाश होईल अशी माहिती पोलिसांनी दिली आहे.

हेही वाचा – मुलगा होईल म्हणून सांगितलं.. पण मुलगी झाली.. माथेफिरूंनी 75 वर्षीय पुजाऱ्याला गोळ्या झाडून संपवलं!