साखरपुड्याचा आनंद क्षणात मावळला! घराकडे परतणाऱ्या भरधाव ट्रॅक्टरची कारला धडक; अपघातात 3 मित्रांचा दुर्दैवी मृत्यू

हरियाणातील नूह जिल्ह्यात शनिवारी रात्रीच्या सुमारास एका भीषण आणि अत्यंत वेदनादायक रस्ता अपघातात तीन तरुण मित्रांचा जागीच दुर्दैवी अंत झाला. साखरपुड्याचा आनंददायी सोहळा आटोपून मोठ्या उत्साहाने आपल्या घराकडे परतत असताना या तरुणांच्या गाडीवर काळाने अचानक घाला घातला. भरधाव वेगाने येणाऱ्या एका ट्रॅक्टर-ट्रॉलीने त्यांच्या कारला दिलेल्या थेट धडकेमुळे ही दुर्घटना घडली. अपघाताचे स्वरूप इतके भयानक होते की, वाहनाचा चक्काचूर होऊन मृतदेह आतच अडकून पडले होते. अखेर ते बाहेर काढण्यासाठी पोलिसांना तातडीने जेसीबी पाचारण करावा लागला.

साखरपुड्याचा आनंद क्षणात मावळला; तिघांचा जागीच मृत्यू

मिळालेल्या माहितीनुसार, गुरुग्राम आणि सोहना परिसरातील रहिवासी असलेले हे तरुण फिरोजपूर झिरका येथे आयोजित एका कौटुंबिक साखरपुड्याच्या कार्यक्रमात सहभागी होण्यासाठी गेले होते. कार्यक्रम आटोपून रात्री उशिरा ते आपल्या इको कारने माघारी परतत होते. नूह परिसराजवळ पोहोचले असता एका बेकाबू ट्रॅक्टर-ट्रॉलीने त्यांच्या कारला भीषण धडक दिली. या अपघातात अनिल (वय 26 वर्षे), विवेक (चालक) आणि रवी (वय 28 वर्षे) यांचा जागीच प्राण गेला. घटनेनंतर परिसरात मोठा आक्रोश आणि हळहळ व्यक्त केली जात आहे.

जेसीबीच्या मदतीने अडकलेले मृतदेह काढले बाहेर

दरम्या, ही धडक इतकी जोरदार होती की कारचे पार तुकडे झाले आणि तिन्ही मृतदेह भीषण अवस्थेत वाहनामध्ये अडकून पडले. घटनास्थळी जमलेल्या स्थानिकांनी आणि पोलिसांनी तातडीने मदतकार्य सुरू केले; मात्र मृतदेह बाहेर काढणे कठीण झाल्याने शेवटी बुलडोझरच्या मदतीने गाडीचा सांगाडा बाजूला करून मृतदेह बाहेर काढण्यात आले. या घटनेनंतर घाबरलेल्या ट्रॅक्टर-ट्रॉली चालकाने आपले वाहन सोडून घटनास्थळावरून पोबारा केला.

हेही वाचा –  भीषण अपघात! बायपास रोडवर एकापेक्षा जास्त वाहनांनी एकमेकांना धडक; वाहने जळून खाक, 4 जणांचा होरपळून मृत्यू

पोलीस तपास आणि कायदेशीर कारवाई सुरू

घटनेची माहिती मिळताच पोलीस दलाने घटनास्थळी पोहोचून तिन्ही मृतदेह ताब्यात घेतले आणि शवविच्छेदनासाठी शासकीय रुग्णालयात पाठवले. फरार ट्रॅक्टर चालकाविरोधात निष्काळजीपणाचा आणि गंभीर गुन्हा दाखल करण्यात आला असून, त्याचा शोध घेण्यासाठी पथके रवाना करण्यात आली आहेत. सणासुदीच्या काळात अशा प्रकारे ऐन तारुण्यात तीन तरुणांचा अचानक अंत झाल्याने त्यांच्या कुटुंबांवर दुःखाचा डोंगर कोसळला आहे.