कॉकरोच जनता पार्टी (सीजेपी) या संघटनेच्या प्रमुख नेत्यांच्या न्यायालयीन कोठडीवरून सुरू असलेला कायदेशीर लढा आता एका नव्या वादात सापडला आहे. जंतर-मंतर परिसरात बंदीचे उल्लंघन करून घोषणाबाजी केल्याप्रकरणी सीजेपीचे सहसंयोजक आशुतोष रांका आणि सौरभ दास सध्या न्यायालयीन कोठडीत आहेत. स्पेशल एक्झिक्यूटिव्ह मॅजिस्ट्रेट कोर्टाने त्यांच्या कोठडीत वाढ केल्यानंतर, या निर्णयाला दिल्ली उच्च न्यायालयात आव्हान देण्यात आले होते. मात्र, सुनावणी दरम्यान उच्च न्यायालयाने दोन्ही नेत्यांचे वय विचारून, “तुम्ही काही ‘जेन झी’ नाहीत,” अशी अत्यंत कडक टिप्पणी केली. या विधानानंतर याचिका मागे घेण्याची नामुष्की ओढवली असली, तरी सीजेपीचे संस्थापक अभिजीत दीपके यांनी या विधानाचा संदर्भ घेत सोशल मीडियावर केलेली एक ओळीची पोस्ट सध्या प्रचंड व्हायरल होत आहे.
न्यायालयाच्या वक्तव्यावर टिप्पणी
न्यायालयाच्या या टिप्पणीच्या पार्श्वभूमीवर, अभिजीत दीपके यांनी त्यांच्या अधिकृत एक्स (X) खात्यावर पंतप्रधान नरेंद्र मोदी यांचा एक फोटो शेअर करत एक ओळीचे कॅप्शन दिले. सीजेपीच्या पहिल्या आंदोलनानंतर पंतप्रधान मोदींनी इन्स्टाग्रामवर तरुणांशी (Gen Z) साधलेल्या संवादाच्या व्हिडिओचा स्क्रीनशॉट वापरत, दीपके यांनी “देशात केवळ एकच व्यक्ती ‘जेन झी’ म्हणून पात्र ठरते,” अशा आशयाची खोचक ओळ इंग्रजीत लिहिली. न्यायालयाच्या टिप्पणीला थेट पंतप्रधान मोदींच्या प्रसिद्धी मोहिमेशी जोडल्यामुळे दीपके यांच्या या पोस्टची राजकीय आणि सोशल मीडिया वर्तुळात तुफान चर्चा रंगली असून, नेटिझन्सकडून त्यावर विविध प्रतिक्रिया उमटत आहेत.
हेही वाचा – निर्मला सीतारामन यांच्या पतींची SIR विरोधी आंदोलनात एन्ट्री; 23 ऑक्टोबरला नेमकं काय घडणार?
न्यायालयीन कोठडी कायम
जंतर-मंतरवरील बंदी आदेश मोडून गेटवरून आत जात निदर्शने केल्याप्रकरणी पोलिसांनी दोन्ही नेत्यांवर कडक कारवाई केली होती. उच्च न्यायालयाने कायद्याची रीतसर प्रक्रिया पूर्ण करण्याचे निर्देश देत याचिका फेटाळल्यानंतर, रांका आणि दास यांना तात्पुरता दिलासा मिळालेला नाही. मॅजिस्ट्रेट कोर्टाच्या आदेशानुसार त्यांची कोठडी कायम ठेवण्यात आली असून, आता या नेत्यांची सुटका नेमकी कधी आणि कशी होणार, याकडे सर्वांचे लक्ष लागले आहे. या कायदेशीर लढाईत आता सोशल मीडियावरील आरोप-प्रत्यारोपांमुळे वातावरणात अधिकच रंगत आली आहे.
