जळगाव : पोळ्याच्या सणादिवशी नैवेद्यासाठी ठेवलेली तब्बल तीन तोळ्यांची सोन्याची पोत बैलाने गिळल्याची अनोखी घटना समोर आली आहे. या सोन्याच्या पोतीची किंमत तब्बल 4 लाख 71 हजार रुपये असल्याचे सांगण्यात येत आहे. नाशिक जिल्ह्यातील मालेगाव तालुक्यातील वनपट येथील शेतकरी शिवाजी बोरसे यांच्या बैलाने पुरणपोळी खाताना चुकून सोन्याची पोतही गिळली. तब्बल दहा दिवसांनंतर चाळीसगाव येथील पशुवैद्यकीय रुग्णालयातील अधिकाऱ्यांनी शस्त्रक्रिया करून ही सोन्याची पोत बैलाच्या पोटातून बाहेर काढली.
मिळालेल्या माहितीनुसार, पोळ्याच्या दिवशी शेतकरी कुटुंबाकडून बैलांची पूजा करण्यात आली. यावेळी पुरणपोळीचा नैवेद्य दाखवण्यात आला होता. औक्षण करण्यासाठी सोन्याची पोत नैवेद्याजवळ ठेवण्यात आली होती. बैलजोडीला पुरणपोळीचा नैवेद्य देत असताना एका बैलाने पुरणपोळीबरोबरच जवळ ठेवलेली सोन्याची पोतही गिळली.
सुरुवातीला बैलाने नेमके काय गिळले, याचा अंदाज शेतकरी कुटुंबाला आला नाही. मात्र सोन्याची पोत गायब झाल्याचे लक्षात आल्यानंतर बैलजोडीतील नेमक्या कोणत्या बैलाने ती गिळली, याबाबत संभ्रम निर्माण झाला. बैलांच्या प्रकृतीवर लक्ष ठेवण्यात आले. मात्र सोन्याची पोत पोटात गेल्याचा संशय अधिक बळावल्याने पशुवैद्यकीय अधिकाऱ्यांशी संपर्क साधण्यात आला.
त्यानंतर बैलाला चाळीसगाव येथील पशुवैद्यकीय रुग्णालयात आणण्यात आले. आधुनिक एक्स-रेच्या मदतीने बैलाच्या पोटाची तपासणी करण्यात आली. या तपासणीत बैलाच्या पोटात सोन्याची पोत असल्याचे स्पष्ट झाले. त्यानंतर पशुवैद्यकीय अधिकाऱ्यांनी पुढील उपचार आणि शस्त्रक्रियेचा निर्णय घेतला.
सोन्याची पोत गिळल्याच्या घटनेला तब्बल दहा दिवस उलटल्यानंतर बैलावर शस्त्रक्रिया करण्यात आली. पशुवैद्यकीय अधिकाऱ्यांनी काळजीपूर्वक शस्त्रक्रिया करत बैलाच्या पोटातून तीन तोळ्यांची सोन्याची पोत बाहेर काढली. शस्त्रक्रिया यशस्वी झाल्यानंतर बैलाची प्रकृती स्थिर असल्याची माहिती देण्यात आली.
बैलाच्या पोटातून सोन्याची पोत सुखरूप बाहेर काढण्यात पशुवैद्यकीय अधिकाऱ्यांना यश आल्याने शेतकरी शिवाजी बोरसे यांनी सुटकेचा निःश्वास सोडला. लाखो रुपये किमतीची सोन्याची पोत परत मिळाल्याने कुटुंबाचा मोठा आर्थिक धोका टळला. त्याचबरोबर बैलावर यशस्वी उपचार झाल्याने शेतकरी कुटुंबासाठी ही घटना दिलासादायक ठरली.
पोळ्याच्या दिवशी घडलेल्या या अनोख्या घटनेची परिसरात चर्चा रंगली आहे. पुरणपोळीच्या नैवेद्यासोबत चुकून सोन्याची पोत गिळलेल्या बैलावर दहा दिवसांनी यशस्वी शस्त्रक्रिया करून ती बाहेर काढण्यात आल्याने ही घटना सध्या चर्चेचा विषय ठरली आहे.
