सातारा: देशातील पहिली सैनिक शाळा म्हणून ओळखली जाणारी सातारा येथील सैनिक शाळा आता मोठ्या प्रमाणावर दुरुस्ती व आधुनिकीकरणाच्या प्रक्रियेतून जात आहे. राज्य सरकारने यासाठी तब्बल 450 कोटी रुपयांचा निधी मंजूर केला असून, कामाचा पहिला टप्पा सध्या सुरू आहे.
सार्वजनिक बांधकाम विभागाच्या माहितीनुसार, प्रथम टप्प्यात 283 कोटी रुपयांच्या कामांना गती देण्यात आली आहे. शाळेतील विद्यार्थ्यांसाठी तीन नवे वसतिगृह, तसेच प्राचार्य आणि कमांडंटसाठी निवासी घरे बांधून पूर्ण केली आहेत. शाळेचे दैनंदिन शिक्षणकार्य अबाधित ठेवूनच कामे सुरू असल्याचे विभागाचे अधीक्षक अभियंता जाधव यांनी सांगितले. पहिला टप्पा मार्च 2026 पर्यंत पूर्ण होण्याची अपेक्षा आहे.
दुसऱ्या टप्प्यात शाळेची मुख्य शैक्षणिक इमारत, वर्गखोल्या आणि इतर आधुनिक सुविधा उभारण्याचे काम होणार आहे. शाळेकडून काही अतिरिक्त मागण्या प्राप्त झाल्यानंतर ही प्रक्रिया सुरू केली जाईल.
हेही वाचा: Farmer ID: शेतकऱ्यांनो सावधान! कृषी योजनांतील गैरप्रकार रोखण्यासाठी सरकारचा मोठा निर्णय
सातारा येथील ही सैनिक शाळा ही माजी संरक्षण मंत्री व महाराष्ट्राचे पहिले मुख्यमंत्री यशवंतराव चव्हाण यांच्या प्रयत्नांतून स्थापन झाली. 23 जून 1961 रोजी तत्कालीन संरक्षण मंत्री व्ही. के. कृष्ण मेनन यांच्या हस्ते शाळेचे उद्घाटन झाले. आर्थिकदृष्ट्या दुर्बळ कुटुंबातील विद्यार्थ्यांना राष्ट्रीय संरक्षण अकादमी (NDA) आणि इतर दलांच्या प्रशिक्षण संस्थांमध्ये प्रवेश योग्यता मिळावी, हा या शाळेच्या स्थापनेमागील प्रमुख हेतू होता.
काळानुसार ही शाळा शिस्त, शिक्षण आणि विद्यार्थी विकासाच्या दृष्टीने देशभरातील सैनिक शाळांमध्ये आदर्श म्हणून ओळखली जाते. अलीकडील काळात मुलींसाठीही प्रवेश सुरू करण्यात आला असून, अनेक विद्यार्थी संरक्षण सेवेत तसेच इतर क्षेत्रांतही यशस्वी ठरले आहेत. या शाळेतून भारतीय हवाई दलाचे माजी प्रमुख पी. व्ही. नाईक यांच्यासह अनेक उल्लेखनीय माजी विद्यार्थी घडले आहेत.
शाळेच्या माजी विद्यार्थ्यांच्या मते, ही दुरुस्ती अनेक वर्षांपूर्वीच व्हायला हवी होती. अधिकाधिक प्रगत सुविधा, क्रीडा संकुले आणि व्यक्तिमत्व विकासासाठी आवश्यक साधने उपलब्ध झाल्यासच शाळा सध्याच्या स्पर्धात्मक शिक्षण प्रणालीशी सुसंगत राहील, असे विद्यार्थी सांगत आहेत. पश्चिम महाराष्ट्रासाठी ही संस्था केवळ शाळा नसून एक अभिमानाचे केंद्र आहे, असे निवृत्त लष्करी अधिकारी आणि माजी विद्यार्थी ले. कर्नल आर. आर. जाधव यांनी नमूद केले.
