तुकाराम मुंढे FDA आयुक्तपदी कायम की बदली होणार? अखेर मुंढेंनीच स्पष्ट केली भूमिका; नेमकं काय म्हणाले?
मुंबई : महाराष्ट्रातील अन्न व औषध प्रशासनाचे (FDA) आयुक्त तुकाराम मुंढे यांच्या बदलीच्या चर्चांना आता पूर्णविराम मिळाला आहे. आपली बदली झाल्याच्या वृत्तांचे मुंढे यांनी खंडन केले असून, आपण अद्यापही महाराष्ट्र FDA आयुक्त म्हणून कार्यरत असल्याचे स्पष्ट केले आहे. भेसळयुक्त अन्नपदार्थ आणि निकृष्ट औषधांविरोधातील कारवाई सुरूच राहणार असल्याचेही त्यांनी सांगितले. त्यांच्या या स्पष्टीकरणामुळे प्रशासकीय वर्तुळात सुरू असलेल्या चर्चांना नवे वळण मिळाले आहे.
तुकाराम मुंढे नेमकं काय म्हणाले?
१२ ऑक्टोबर रोजी तुकाराम मुंढे यांनी सोशल मीडियावर पोस्ट करत बदलीच्या वृत्तांबाबत भूमिका स्पष्ट केली. आपली FDA मधून बदली झालेली नसून, आपण याच विभागात आयुक्त म्हणून काम करत असल्याचे त्यांनी नमूद केले. नागरिकांना सुरक्षित अन्नपदार्थ मिळावेत आणि बनावट तसेच निकृष्ट दर्जाच्या औषधांवर नियंत्रण ठेवता यावे, यासाठी विभागाची मोहीम सुरू राहणार असल्याचे त्यांनी सांगितले.
No, I have not been transferred from FDA. नाही, माझी FDA मधून बदली झालेली नाही. I continue to serve as Commissioner, FDA Maharashtra. Our fight against unsafe, substandard, adulterated food and spurious, substandard drugs goes on. मी अन्न व औषध प्रशासन, महाराष्ट्र येथे आयुक्त म्हणून कार्यरत आहे. भेसळयुक्त अन्न आणि निकृष्ट औषधांविरुद्धची आमची लढाई सुरूच आहे. #TukaramMundhe #Trust — Tukaram Mundhe (@Tukaram_IndIAS) October 12, 2026
बदलीच्या चर्चांना कारण काय?
महाराष्ट्र लोकसेवा आयोगाच्या (MPSC) परीक्षांमधील कथित अनियमिततेच्या चौकशीसाठी राज्य सरकारने समिती स्थापन केली आहे. या समितीच्या सचिवपदाची जबाबदारी तुकाराम मुंढे यांच्याकडे सोपवण्यात आली. त्यानंतर त्यांची FDA आयुक्तपदावरून बदली झाल्याच्या चर्चा सुरू झाल्या होत्या. मात्र, मुंढे यांनी स्वतःच या वृत्तांचे खंडन केले.
भेसळयुक्त अन्न आणि निकृष्ट औषधांविरोधातील मोहीम सुरूच
FDA विभागाकडून अन्नपदार्थांची गुणवत्ता तपासणे, भेसळ रोखणे आणि औषधांच्या दर्जावर लक्ष ठेवणे यांसारखी कामे केली जातात. नागरिकांच्या आरोग्याच्या दृष्टीने या कारवाईला महत्त्व आहे. असुरक्षित अन्नपदार्थ, भेसळयुक्त उत्पादने आणि निकृष्ट औषधांविरोधातील लढा सुरूच राहील, असा स्पष्ट संदेश मुंढे यांनी दिला आहे.
दरम्यान, MPSC चौकशी समितीचे काम आणि FDA आयुक्त म्हणून त्यांची जबाबदारी याबाबत पुढील प्रशासकीय घडामोडींकडे लक्ष लागले आहे. सध्या तरी मुंढे यांनी आपण FDA आयुक्तपदी कायम असल्याचे स्पष्ट केले आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.