दसरा-दिवाळीआधी राज्य सरकारचं कर्मचाऱ्यांना मोठं गिफ्ट! महागाई भत्त्यात 3 टक्क्यांची घसघशीत वाढ

सणासुदीपूर्वी त्रिपुरा सरकारने राज्यातील सरकारी कर्मचाऱ्यांना आणि निवृत्तीवेतनधारकांना (Pensioners) मोठी भेट दिली आहे. मुख्यमंत्री माणिक साहा आणि अर्थमंत्री प्रणजीत सिंग रॉय यांच्या उपस्थितीत 6 ऑक्टोबर रोजी झालेल्या मंत्रिमंडळाच्या बैठकीत महागाई भत्ता (Dearness Allowance – DA) आणि महागाई सवलतीत 3 टक्क्यांनी वाढ करण्याचा निर्णय घेण्यात आला. या सुधारणेनंतर कर्मचाऱ्यांना मिळणारा महागाई भत्ता आता 44 टक्के दराने मिळणार आहे. ही वाढ 1 ऑक्टोबर 2026 पासून लागू केली जाणार असून, ऑक्टोबर महिन्याच्या वेतनामध्ये कर्मचाऱ्यांना आणि पेन्शनधारकांना वाढीव रक्कम प्रत्यक्ष मिळणार आहे.

घरभाडे भत्त्यात 2 टक्क्यांची वाढ

महागाई भत्त्यासोबतच राज्य सरकारने कर्मचाऱ्यांच्या घरभाडे भत्त्यातही महत्त्वपूर्ण सुधारणा केली आहे. घरभाडे भत्ता 2 टक्क्यांनी वाढवण्यात आला असून तो आता मूळ वेतनाच्या 8 टक्क्यांवरून थेट 10 टक्के करण्यात आला आहे. या निर्णयामुळे ज्या कर्मचाऱ्याचे मूळ वेतन 30,000 रुपये आहे, त्याला पूर्वी मिळणाऱ्या 2,400 रुपयांऐवजी आता दरमहा 3,000 रुपये घरभाडे भत्ता मिळणार आहे. म्हणजेच केवळ एचआरएच्या माध्यमातून कर्मचाऱ्यांच्या मासिक उत्पन्नात 600 रुपयांची अतिरिक्त वाढ होणार आहे.

हेही वाचा – बँकांची मनमानी चालणार नाही! FDच्या व्याजदरात परस्पर कपात केल्याबद्दल हायकोर्टाचा दणका; ठेवीदारांच्या बाजूने ऐतिहासिक निर्णय

राज्याच्या तिजोरीवर पडणार 300 कोटी रुपयांचा अतिरिक्त वार्षिक भार

या कल्याणकारी निर्णयाची माहिती देताना मुख्यमंत्र्यांनी स्पष्ट केले की, आर्थिक आव्हाने आणि मर्यादा असूनही राज्य सरकार कर्मचारी व निवृत्तीवेतनधारकांच्या हितासाठी वचनबद्ध आहे. भत्त्यांमधील या वाढीमुळे त्रिपुरा सरकारच्या तिजोरीवर दरवर्षी साधारणपणे 300 कोटी रुपयांचा अतिरिक्त आर्थिक भार पडणार आहे. तरीही सणासुदीच्या काळात कर्मचाऱ्यांची क्रयशक्ती वाढावी आणि त्यांना दिलासा मिळावा या उद्देशाने सरकारने ही आर्थिक घोषणा केली आहे. या निर्णयामुळे राज्यातील लाखो सरकारी कर्मचारी आणि पेन्शनधारकांमध्ये आनंदाचे वातावरण पसरले आहे.