मुंबईकरांचा प्रवास होणार सुसाट! कल्याण-कसारा मार्गाबाबत मध्य रेल्वेने दिली मोठी अपडेट

मुंबईकरांचा लोकल प्रवास आता सुसाट होणार आहे. उपनगरीय लोकल सेवेला वारंवार होणाऱ्या विलंबापासून आणि तांत्रिक अडथळ्यांपासून मोठा दिलासा मिळण्याची शक्यता निर्माण झाली आहे. झाडे कोसळणे, तांत्रिक बिघाड किंवा देखभाल दुरुस्तीच्या मेगाब्लॉकमुळे लोकलचे वेळापत्रक कोलमडणे आणि प्रवाशांना नाहक मनस्ताप सहन करावा लागणे आता इतिहास जमा होणार आहे. मध्य रेल्वे प्रशासनाने प्रवाशांचा प्रवास वेगवान आणि सुखकर करण्यासाठी एक महत्त्वाचे पाऊल उचलले असून, कल्याण-कसारा आणि खर्डी ते कसारा स्थानकांदरम्यान नव्याने तयार करण्यात आलेल्या तिसऱ्या रेल्वे मार्गावरून प्रवासी वाहतूक सुरू करण्याचा मार्ग मोकळा झाला आहे. रेल्वे सुरक्षा आयुक्तांनी या नवीन मार्गिकेला हिरवा कंदील दाखवल्यामुळे मुंबईकरांचा प्रवास आता अधिक जलद होणार आहे.

वाहतुकीचा ताण होणार कमी

टिटवाळा, आसनगाव, खर्डी आणि कसारा यांसारख्या उपनगरीय परिसरामध्ये राहणारे लाखो नागरिक दररोज नोकरी-व्यवसायासाठी मुंबईच्या दिशेने ये-जा करतात. या पट्ट्यात यापूर्वी केवळ मोजक्याच मार्गिका उपलब्ध असल्यामुळे लोकल गाड्यांसोबतच लांब पल्ल्याच्या एक्सप्रेस आणि मालगाड्यांचा भार एकाच रुळावर पडत होता. यामुळे लोकल गाड्यांना तासनतास थांबावे लागत असे आणि प्रवाशांना लेटमार्कचा सामना करावा लागे. या समस्येवर तोडगा काढण्यासाठी सुरू करण्यात आलेल्या या तिसऱ्या नव्या मार्गिकेमुळे लोकल आणि एक्सप्रेस गाड्यांची वाहतूक स्वतंत्रपणे करणे शक्य होणार आहे. परिणामी, गाड्यांचे वेळापत्रक सुरळीत राहून प्रवाशांचा बहुमूल्य वेळ वाचणार आहे.

हेही वाचा – ड्रायव्हिंग लायसन्ससाठी नवा नियम; किती टक्के गुण मिळवावे लागणार?

प्रकल्पाची वैशिष्ट्ये आणि सुरक्षा चाचण्या यशस्वी

या महत्त्वाकांक्षी तिसऱ्या रेल्वे मार्ग प्रकल्पाची एकूण लांबी 67 किलोमीटर इतकी आहे. नवीन मार्गावर सुरक्षित आणि सुरळीत वाहतूक चालावी यासाठी रेल्वे प्रशासनाकडून कडक नियम लागू करण्यात आले आहेत. सिग्नल यंत्रणेच्या दोन्ही बाजूंना प्रत्येकी 100 मीटर अंतरापर्यंत ताशी 30 किलोमीटर इतकी वेगमर्यादा निश्चित करण्यात आली आहे, तर इतर टप्प्यांवर गाड्यांचा वेग वाढवण्याचे नियोजन आहे. काही दिवसांपूर्वीच, म्हणजेच 18 ऑक्टोबर रोजी रेल्वे सुरक्षा आयुक्तांच्या पथकाने विशेष रेल्वे गाडीच्या माध्यमातून या संपूर्ण मार्गावर प्रत्यक्ष पाहणी करून सुरक्षिततेची आणि वेगाची कसून चाचणी घेतली होती. ही चाचणी यशस्वी ठरल्यामुळे आता लवकरच प्रत्यक्षात प्रवासी गाड्या या मार्गावरून धावणार आहेत.