‘सर्वोच्च न्यायालयावरील मोर्चा लोकशाहीसाठी काळा दिवस…’; एकनाथ शिंदेंचा विरोधकांवर जोरदार हल्लाबोल

राजधानी दिल्लीत इंडिया आघाडी आणि कॉकरोच जनता पार्टीच्या (CJP) वतीने थेट सर्वोच्च न्यायालयावर काढण्यात आलेल्या मोर्चावरून महाराष्ट्राचे उपमुख्यमंत्री एकनाथ शिंदे यांनी विरोधी पक्षांवर अत्यंत तिखट शब्दांत ताशेरे ओडले आहेत. कालचा दिवस हा भारतीय लोकशाहीच्या आणि देशाच्या इतिहासातील अत्यंत काळा दिवस होता, अशी संतप्त प्रतिक्रिया त्यांनी व्यक्त केली. डॉ. बाबासाहेब आंबेडकर यांनी अत्यंत विचारपूर्वक रचलेल्या संविधानिक संस्थांवर अशा प्रकारे दबाव आणणे आणि थेट न्यायालयावर चाल करून जाणे ही घटना अत्यंत संतापजनक आहे. राहुल गांधी आणि त्यांच्या मित्रपक्षांनी रचलेला हा राजकीय थरार लोकशाहीचा गळा घोटणारा असून, विरोधकांच्या या कृत्याचा जितका निषेध करावा तितका थोडाच आहे, असा घणाघात त्यांनी केला.

‘परकीय ताकदींचा हस्तक्षेप अन् देशद्रोही मानसिकता’; मुख्यमंत्र्यांचा खळबळजनक दावा

प्रसारमाध्यमांशी बोलताना एकनाथ शिंदे यांनी या आंदोलनामागे मोठे आंतरराष्ट्रीय कारस्थान आणि परकीय शक्तींचा हात असल्याचा गंभीर संशय व्यक्त केला. देशात अराजकता माजवून इथल्या शांततेला सुरुंग लावण्याचा कट रचला जात असल्याचे ते म्हणाले. आगामी काळात निवडणुकांच्या मैदानात किंवा पंतप्रधान नरेंद्र मोदी यांच्या नेतृत्वाविरुद्ध थेट लढून जिंकता येत नाही, हे स्पष्ट झाल्यामुळेच विरोधी पक्ष अशा प्रकारचे मार्ग अवलंबत आहेत. देशाच्या स्वातंत्र्य आणि सार्वभौमत्वाला धोका निर्माण करून देशात अस्वस्थता पसरवण्याचा हा प्रयत्न असून, ही विरोधकांची पूर्णपणे देशद्रोही मानसिकता दर्शवते, असा घणाघाती आरोपही त्यांनी केला.

हेही वाचा – ‘हा विजय दादांच्या कार्याला समर्पित!’ सोमेश्वरच्या विजयानंतर सुनेत्रा पवारांची भावुक पोस्ट

न्यायव्यवस्थेचा अनादर केल्याप्रकरणी माफीची मागणी

भारतीय न्यायव्यवस्थेवर अशा प्रकारे थेट हल्ला चढवून संविधानाचा अवमान केल्याबद्दल राहुल गांधी आणि इंडिया आघाडीने संपूर्ण देशाची माफी मागितली पाहिजे, अशी मागणी एकनाथ शिंदे यांनी केली. लोकशाहीत प्रत्येक नागरिकाला आणि पक्षाला शांततापूर्ण मार्गाने आपले मत मांडण्याचा किंवा याचिका दाखल करण्याचा पूर्ण अधिकार आहे. मात्र, कायदा हातात घेऊन आणि न्यायालयांवर दबाव आणून राज्यघटनेचा बळी देण्याचा हा प्रयत्न देशासाठी अत्यंत घातक ठरू शकतो. राजकीय स्वार्थासाठी संविधानाचा ढाल म्हणून वापर करणाऱ्या विरोधकांचा बुरखा आता जनतेसमोर पूर्णपणे फाटला आहे, असेही ते शेवटी म्हणाले.