आधी एपस्टिनसोबत फोटो व्हायरल, आता राज्यसभेच्या पोटनिवडणुकीसाठी उमेदवारी; ‘या’ केंद्रीय मंत्र्याला भाजपकडून संधी

भारतीय जनता पक्षाने (BJP) मध्य प्रदेशातील राज्यसभेच्या आगामी पोटनिवडणुकीसाठी केंद्रीय मंत्री हरदीप सिंग पुरी यांच्या उमेदवारीवर शिक्कामोर्तब केले आहे. भाजपच्या केंद्रीय निवडणूक समितीने बुधवारी नवी दिल्लीतील पक्ष मुख्यालयातून जारी केलेल्या अधिकृत प्रसिद्धीपत्रकाद्वारे ही घोषणा केली. पक्षाचे अनुभवी नेते आणि केंद्रीय मंत्रिमंडळातील महत्त्वाचे मंत्री असलेल्या हरदीप सिंग पुरी यांना मध्य प्रदेशच्या रिक्त झालेल्या जागेवरून राज्यसभेत पाठवण्याचा निर्णय पक्षाने घेतला आहे. काही दिवसांपूर्वी हरदीप सिंग पुरी यांचे लैंगिक गुन्हेगार जेफ्री एपस्टीनसोबतचे फोटो व्हायरल झाले होते.

एल. मुरुगन यांच्या राजीनाम्यामुळे रिक्त झाली होती जागा

माजी केंद्रीय मंत्री एल. मुरुगन यांनी दिलेल्या राजीनाम्यामुळे मध्य प्रदेशातील राज्यसभेची ही जागा रिक्त झाली होती. भारतीय निवडणूक आयोगाने (ECI) दिलेल्या माहितीनुसार, मुरुगन यांच्या राजीनाम्यानंतर 14 ऑक्टोबर 2026 रोजी ही जागा अधिकृतपणे रिकामी झाली. मुरुगन यांचा या जागेवरील मूळ कार्यकाळ 2 एप्रिल 2030 पर्यंत होता. मात्र, त्यांनी अचानक राजीनामा दिल्याने निवडणूक आयोगाने 22 ऑक्टोबर रोजी या जागेवरील पोटनिवडणुकीचा सविस्तर कार्यक्रम जाहीर केला होता.

निवडणुकीचे वेळापत्रक आणि महत्त्वाच्या तारखा

निवडणूक आयोगाने निश्चित केलेल्या अधिकृत वेळापत्रकानुसार या पोटनिवडणुकीची प्रक्रिया पार पडणार आहे:

• अधिसूचना जारी करणे: 26 ऑक्टोबर 2026
• उमेदवारी अर्ज भरण्याची अंतिम तारीख: 2 नोव्हेंबर 2026
• अर्जांची छाननी: 3 नोव्हेंबर 2026
• उमेदवारी मागे घेण्याची मुदत: 5 नोव्हेंबर 2026
• मतदानाची तारीख व वेळ: 12 नोव्हेंबर रोजी सकाळी 9:00 ते दुपारी 4:00 वाजेपर्यंत
• मतमोजणी आणि निकाल: 12 नोव्हेंबर रोजी संध्याकाळी 5:00 वाजता

हेही वाचा –  “शिंदेंवर आरोप केले तर तुम्ही ठाण्यातून परत जाणार नाही” नरेश म्हस्केंची कठोर शब्दात तंबी

16 नोव्हेंबरपूर्वी पूर्ण होणार निवडणूक प्रक्रिया

निवडणूक आयोगाच्या सूचनेनुसार ही संपूर्ण निवडणूक प्रक्रिया 16 नोव्हेंबर 2026 पूर्वी पूर्ण केली जाणार आहे. माजी प्रशासकीय अधिकारी आणि अनुभवी मुत्सद्दी असलेले हरदीप सिंग पुरी हे सध्या केंद्र सरकारमध्ये महत्त्वाच्या खात्यांचे केंद्रीय मंत्री म्हणून जबाबदारी सांभाळत आहेत. मध्य प्रदेशातून भाजपचे पारडे जड असल्याने हरदीप सिंग पुरी यांचा राज्यसभेत जाण्याचा मार्ग अत्यंत सुकर मानला जात आहे.