राजधानी दिल्लीत आज राजकीय वातावरण पूर्णपणे ढवळून निघालं आहे. मुख्य निवडणूक आयुक्त ज्ञानेश कुमार यांच्या राजीनाम्याची मागणी करत ‘इंडिया’ (INDIA) आघाडीच्या सर्व प्रमुख पक्षांच्या खासदारांनी संसदेपासून निवडणूक आयोगाच्या मुख्यालयापर्यंत धडक मोर्चा काढला. लोकसभेतील विरोधी पक्षनेते राहुल गांधी यांच्या नेतृत्वात निघालेल्या या मोर्चात काँग्रेस खासदार प्रियंका गांधी, राष्ट्रवादी काँग्रेसच्या सुप्रिया सुळे, समाजवादी पक्षाचे अध्यक्ष अखिलेश यादव यांच्यासह इतर विरोधी पक्षांचे खासदार मोठ्या संख्येने सहभागी झाले होते. निवडणूक आयोग मुख्यालयापासून अवघ्या 100 मीटर अंतरावर दिल्ली पोलिसांनी मोठा बंदोबस्त लावून हा मोर्चा रोखला. यानंतर राहुल गांधी आणि प्रियंका गांधी यांच्यासह सर्वच खासदारांनी रस्त्यावरच ठिय्या मांडून जोरदार घोषणाबाजी सुरू केली.
संवैधानिक संस्थांची गळचेपी अन् मतदानाचा अधिकार हिरावल्याचा आरोप
या आंदोलनादरम्यान विरोधी पक्षाच्या नेत्यांनी केंद्र सरकार आणि निवडणूक आयोगाच्या कारभारावर जोरदार हल्लाबोल केला. देशातील घटनात्मक संस्थांचा आणि लोकशाहीचा गळा घोटला जात असल्याचा गंभीर आरोप नेत्यांनी केला. मुख्य निवडणूक आयुक्तांनी तातडीने पदाचा राजीनामा द्यावा, अशी एकमुखी मागणी आंदोलकांनी केली. “जनतेचा मतदानाचा अधिकार हिरावून घेण्याचे काम सुरू असून लोकशाहीचे रक्षण करण्यासाठीच आम्हाला रस्त्यावर उतरावे लागले आहे,” अशी उद्विग्नता नेत्यांनी व्यक्त केली. जोपर्यंत मुख्य निवडणूक आयुक्त आपल्या पदावरून हटत नाहीत, तोपर्यंत हे आंदोलन असेच पेटत राहील, असा इशाराही विरोधी पक्षांच्या नेत्यांनी या वेळी दिला.
#WATCH INDIA ब्लॉत के सांसदों ने चुनाव आयोग तक अपने विरोध मार्च के दौरान “वोट चोर, गद्दी छोड़” के नारे लगाए। https://t.co/hU2eM48dJg — ANI_HindiNews (@AHindinews) October 6, 2026
संबित पात्रांचा थेट पलटवार
विरोधी पक्षांच्या या आक्रमक आंदोलनावर भारतीय जनता पक्षाने (BJP) अत्यंत कडक शब्दांत पलटवार केला आहे. भाजपचे राष्ट्रीय प्रवक्ते संबित पात्रा यांनी पत्रकार परिषद घेऊन काँग्रेस आणि विरोधी आघाडीवर गंभीर आरोप केले. काँग्रेस पक्ष हा राहुल गांधींना वारंवार राजकारणात री-लॉन्च करण्यासाठी देशामध्ये अराजकता पसरवण्याचा प्रयत्न करत आहे, असा दावा त्यांनी केला. तसेच सत्ता मिळवण्यासाठी आणि राहुल गांधींना खुर्चीवर बसवण्यासाठी भारतातील लोकशाही व संवैधानिक संस्थांची प्रतिमा जाणीवपूर्वक मलिन केली जात असल्याचे पात्रा म्हणाले. राजकीय स्वार्थापोटी देशात भ्रम पसरवण्याचे काम विरोधकांकडून सुरू असल्याचा घणाघाती आरोपही त्यांनी केला.
