पुणे शिक्षक मतदारसंघात नाट्यमय घडामोडी! मंगेश चिवटेंची ऐनवेळी माघार; महायुतीतील जागेचा पेच सुटला?

पुणे शिक्षक मतदारसंघातून भाजपने कौस्तुभ गावडे यांना उमेदवारी दिली होती. मात्र, महायुतीचा घटकपक्ष असलेल्या शिवसेनेनेही मंगेश चिवटे यांना उमेदवारी दिल्याने या जागेवर युतीतील दोन पक्षांचे उमेदवार आमनेसामने येण्याची परिस्थिती निर्माण झाली होती. त्यामुळे महायुतीमध्ये समन्वयाचा प्रश्न उपस्थित झाला होता. आता चिवटे यांनी माघार घेतल्याने भाजपच्या अधिकृत उमेदवाराला दिलासा मिळण्याची शक्यता आहे. एकाच आघाडीतील दोन पक्षांचे उमेदवार निवडणुकीच्या रिंगणात उतरल्यास मतांचे विभाजन होण्याची शक्यता असते. त्यामुळे चिवटेंच्या निर्णयाचा परिणाम निवडणुकीतील लढतीवर होऊ शकतो.

महायुतीतील जागेवरून निर्माण झाला होता पेच

विधानपरिषदेच्या पुणे शिक्षक मतदारसंघासाठी उमेदवारी निश्चित करताना महायुतीमध्ये मतभेद समोर आले होते. भाजपने कौस्तुभ गावडे यांना उमेदवारी दिल्यानंतर शिवसेनेकडून मंगेश चिवटे यांचे नाव पुढे आले. त्यानंतर दोन्ही पक्षांमध्ये या जागेवरून राजकीय चर्चा सुरू झाल्या होत्या. शिवसेनेकडून चिवटे यांनी उमेदवारी अर्ज दाखल केल्यामुळे निवडणुकीत महायुतीतील दोन पक्षांमध्येच लढत होण्याची शक्यता निर्माण झाली होती. त्यामुळे उमेदवारी कायम राहणार की माघार घेतली जाणार, याकडे राजकीय वर्तुळाचे लक्ष लागले होते. अखेर चिवटे यांच्या माघारीमुळे या घडामोडींना नवे वळण मिळाले आहे.