मुंबई : मुंबईतील एका कार्यक्रमात मुख्यमंत्री देवेंद्र फडणवीस, शिवसेना ठाकरे सेनेचे प्रमुख उद्धव ठाकरे आणि मनसे अध्यक्ष राज ठाकरे हे तिघेही एकाच व्यासपीठावर आल्याचे पाहायला मिळाले. प्रशांत कुलकर्णी संपादित ‘महाराष्ट्राच्या हास्यरेषा’ या मराठी व्यंगचित्रकारांच्या इतिहासावरील विशेष ग्रंथाचा प्रकाशन सोहळ्याला या मान्यवरांनी उपस्थितीत दर्शवली होती. या कार्यक्रमात बोलताना राज ठाकरे यांनी आशिष शेलार यांना उत्तर देताना मुख्यमंत्री देवेंद्र फडणवीस यांना कोपरखळी मारली. ते म्हणाले की, यापुढे पण मी मुख्यमंत्र्यांना बोलवत जाईन आणि ते येत जातील. 29 पर्यंत मुख्यमंत्र्यांना ठेवा म्हणजे झालं. राज ठाकरेंच्या या विधानानंतर संपूर्ण सभागृहात एकच हशा पिकला. मुंबईतील दादर येथील स्वातंत्र्यवीर सावरकर स्मारक सभागृहात ‘महाराष्ट्राच्या हास्यरेषा’ या पुस्तकाचा प्रकाशन सोहळा पार पडला. यावेळी राज ठाकरेंनी भाषण करताना फडणवीस यांना कोपरखळी मारली. दरम्यान, राज ठाकरेंच्या आधी बोलताना शेलार यांनी उद्धव ठाकरेंना टोला मारला होता. उद्धवजी, तुम्ही समजून घ्या, राज ठाकरे बोलले की मुख्यमंत्री येतात. यावर राज ठाकरेंनी उत्तर दिले.
