राजधानी दिल्लीत मंगळवारी राजकीय वातावरण अचानक तापले. ‘इंडिया’ (INDIA) आघाडीच्या वतीने मुख्य निवडणूक आयुक्त ज्ञानेश कुमार यांच्या विरोधात आणि त्यांच्या राजीनाम्याच्या मागणीसाठी आकाशवाणी भवन येथे सुरू असलेल्या आंदोलनावर दिल्ली पोलिसांनी कठोर कारवाई केली. पोलिसांनी काँग्रेस नेते राहुल गांधी, प्रियांका गांधी यांच्यासह अनेक वरिष्ठ खासदारांना ताब्यात घेतले आहे. या कारवाईनंतर पोलिसांनी संपूर्ण आकाशवाणी भवन परिसर पूर्णपणे रिकामा केला आहे.
रात्रभर आंदोलनाला परवानगी नाकारत पोलिसांचा इशारा
आकाशवाणी भवन परिसरात ‘इंडिया’ आघाडीच्या प्रमुख नेत्यांनी धरणे आंदोलन सुरू केले होते. मात्र, सुरक्षेचे कारण देत पोलिसांनी या ठिकाणी रात्रभर आंदोलन सुरू ठेवण्यास परवानगी दिली जाणार नाही, असे स्पष्ट केले होते. पोलिसांनी आंदोलकांना परिसर मोकळा करण्याचे आवाहन केले होते. आंदोलकांनी परिसर रिकामा करण्यास नकार दिल्यास त्यांना तात्काळ ताब्यात घेतले जाईल, असा इशाराही प्रशासनाकडून आधीच देण्यात आला होता. त्यानुसार आंदोलक आपल्या भूमिकेवर ठाम राहिल्याने पोलिसांनी ही थेट कारवाई केली.
हेही वाचा – ‘इंडिया’ आघाडीच्या मोर्चादरम्यान जया बच्चन भडकल्या; रिपोर्टरचा माईक ढकलून दिला, व्हिडिओ व्हायरल
प्रमुख नेत्यांना घेतले ताब्यात; पोलिसांशी झाली झटापट
घटनास्थळी राहुल गांधींसोबत उपस्थित असलेल्या प्रमुख नेत्यांना पोलिसांनी बस आणि विशेष वाहनांमध्ये बसवून ताब्यात घेतले. यामध्ये काँग्रेसचे संघटन सरचिटणीस के. सी. वेणुगोपाल, खासदार दीपेंद्र सिंग हुड्डा आणि पंजाब काँग्रेसचे अध्यक्ष अमरिंदर सिंग राजा वडिंग यांच्यासह अनेक वरिष्ठ खासदारांचा समावेश आहे. राहुल गांधींना ताब्यात घेण्याच्या वेळी त्यांचे सुरक्षा रक्षक आणि पोलीस कर्मचाऱ्यांमध्ये काही काळ मोठी झटापट झाली. परिस्थिती नियंत्रणात ठेवण्यासाठी आकाशवाणी भवन परिसरात मोठा पोलीस बंदोबस्त तैनात करण्यात आला होता.
#WATCH | Delhi: Lok Sabha LoP Rahul Gandhi detained by Delhi Police. INDIA bloc MPs were staging a protest at Akashvani Bhavan against Chief Election Commissioner Gyanesh Kumar. (Source: Congress) https://t.co/aoTWXiINaw — ANI (@ANI) October 6, 2026
संसद मार्गावरील वाहतूक पुन्हा पूर्ववत
काँग्रेस नेत्यांना ताब्यात घेतल्यानंतर दिल्ली पोलिसांनी संसद मार्गावर उभारलेले बॅरिकेड्स हटवण्यास सुरुवात केली आहे. सुरक्षेसाठी बंद करण्यात आलेले रस्ते पुन्हा एकदा सामान्य वाहतुकीसाठी खुले करण्यात आले आहेत. मुख्य निवडणूक आयुक्तांच्या राजीनाम्याची मागणी करत विरोधकांनी आक्रमक पवित्रा घेतला असला, तरी कायदा व सुव्यवस्थेचा प्रश्न निर्माण होऊ नये म्हणून ही कारवाई करण्यात आल्याचे दिल्ली पोलिसांनी सांगितले आहे.
