विधान परिषद निवडणुकीचा आज निकाल! 5 जागांसाठी मतमोजणी सुरू; महायुती की महाविकास, आघाडी कोण बाजी मारणार?

महाराष्ट्र विधान परिषदेच्या 5 जागांसाठी झालेल्या निवडणुकीची मतमोजणी आज, 27 ऑक्टोबर रोजी होत आहे. गेल्या आठवड्यातील 23 ऑक्टोबर रोजी पार पडलेल्या मतदानानंतर पुणे पदवीधर, पुणे शिक्षक, नागपूर पदवीधर, छत्रपती संभाजीनगर पदवीधर आणि अमरावती शिक्षक मतदारसंघांच्या निकालाकडे सर्वांचे लक्ष लागले आहे. या निवडणुकीत महायुतीने 3:1:1 असा जागावाटपाचा फॉर्म्युला निश्चित केला होता. मात्र, काही ठिकाणी मित्रपक्षांतील अंतर्गत नाराजी आणि बंडखोरीमुळे राजकीय समीकरणे चर्चेत आली आहेत. महाराष्ट्र विधान परिषदेच्या एकूण 78 जागांपैकी 5 जागांसाठी ही द्विवार्षिक निवडणूक होत आहे. संबंधित सदस्यांचा कार्यकाळ 6 डिसेंबर 2026 रोजी संपणार आहे. त्यामुळे या जागांवर नवीन प्रतिनिधी निवडण्यासाठी मतदान घेण्यात आले. या निवडणुकीत पुणे पदवीधर, नागपूर पदवीधर, छत्रपती संभाजीनगर पदवीधर, पुणे शिक्षक आणि अमरावती शिक्षक या 5 मतदारसंघांचा समावेश आहे. यात एकूण 10,68,072 मतदार असून, 182 उमेदवार निवडणुकीच्या रिंगणात आहेत.

हेही वाचा : बंडखोरांचं ग्रहण, अमरावतीत कोणाचं पारडं जड? महायुती-मविआमध्ये मुख्य लढत

मतदारसंघनिहाय मतदानाची टक्केवारी  –

अमरावती शिक्षक: 92.25 टक्के

पुणे शिक्षक: 85.86 टक्के

नागपूर पदवीधर: 64.82 टक्के

पुणे पदवीधर: 62.76 टक्के

छत्रपती संभाजीनगर पदवीधर: 59.12 टक्के

अमरावती शिक्षक मतदारसंघात सर्वाधिक 92.25 टक्के मतदान झाले. त्यामुळे या मतदारसंघाच्या निकालाकडे विशेष लक्ष लागले आहे. दुसरीकडे, छत्रपती संभाजीनगर पदवीधर मतदारसंघात सर्वात कमी 59.12 टक्के मतदान नोंदवण्यात आले. महायुतीचा 3:1:1 जागावाटपाचा फॉर्म्युलाया निवडणुकीसाठी महायुतीने 3:1:1 असा जागावाटपाचा फॉर्म्युला ठरवल्याची माहिती देण्यात आली आहे. त्यानुसार भाजपने 3 जागांवर, राष्ट्रवादी काँग्रेसच्या सुनेत्रा पवार गटाने 1 जागेवर आणि शिवसेनेच्या शिंदे गटाने 1 जागेवर लक्ष केंद्रित केले. भाजपकडे पुणे पदवीधर, पुणे शिक्षक आणि नागपूर पदवीधर या जागांची जबाबदारी होती. राष्ट्रवादी काँग्रेसच्या सुनेत्रा पवार गटाला छत्रपती संभाजीनगर पदवीधर मतदारसंघ देण्यात आला, तर शिवसेनेच्या शिंदे गटाकडे अमरावती शिक्षक मतदारसंघ होता. मात्र, जागावाटप निश्चित झाले असले तरी महायुतीमध्ये सर्व काही सुरळीत नव्हते. पुण्यात भाजपविरोधात बंडखोर उमेदवारांना शिंदे गटाने पाठिंबा दिल्याची चर्चा होती. त्यामुळे या अंतर्गत मतभेदांचा निकालावर काय परिणाम होतो, हे पाहणे महत्त्वाचे ठरणार आहे.

महाराष्ट्र ते देश-विदेश, ताज्या घडामोडी एका क्लिकवर