मुंबई: इंडियन प्रीमियर लीगमध्ये एकतर्फी ठरलेल्या सामन्यात चेन्नई सुपर किंग्जने मुंबई इंडियन्स ला तब्बल 103 धावांनी पराभूत करत इतिहास रचला. हा विजय चेन्नईसाठी आयपीएलमधील धावांच्या फरकाने सर्वात मोठा ठरला, तर मुंबईसाठी ही स्पर्धेतील सर्वात मोठी हार ठरली. विशेष म्हणजे, हा सामना मुंबईच्या घरच्या वानखेडे मैदानावर झाला, पण चेन्नईने तिथेच मुंबईला पूर्णपणे नमवले.
प्रथम फलंदाजी करताना चेन्नई सुपर किंग्जने 20 षटकांत 207 धावांचा भक्कम डोंगर उभा केला. या डावाचा कणा ठरला तो संजू सॅमसनचा शानदार शतक. सॅमसनने केवळ 54 चेंडूंमध्ये 101 धावांची झंझावाती खेळी साकारत संघाला मोठ्या धावसंख्येपर्यंत पोहोचवले. त्याच्या खेळीत अचूक फटकेबाजी आणि संयम यांचा उत्तम संगम पाहायला मिळाला.
या आव्हानात्मक लक्ष्याचा पाठलाग करताना मुंबई इंडियन्सची फलंदाजी पूर्णपणे कोलमडली. चेन्नईच्या गोलंदाजांसमोर मुंबईचा एकही फलंदाज मोठी खेळी करू शकला नाही. परिणामी, संपूर्ण संघ 20 षटके पूर्ण करण्याआधीच अवघ्या 104 धावांवर बाद झाला. हा पराभव मुंबईसाठी अत्यंत निराशाजनक ठरला.
#CSK’s first ever win by a margin of more than 100 runs ? That’s history written in Yellow ? MATCH HIGHLIGHTS ▶️ https://t.co/SfSkOki0JI#TATAIPL | #KhelBindaas | #MIvCSK pic.twitter.com/K2Lkqn1fhX — IndianPremierLeague (@IPL) April 23, 2026
या सामन्यामुळे मुंबई इंडियन्सच्या सर्वात मोठ्या पराभवाच्या विक्रमात बदल झाला. याआधी 2013 मध्ये राजस्थान रॉयल्सविरुद्ध 87 धावांनी पराभव ही त्यांची सर्वात मोठी हार होती. तसेच, चेन्नईविरुद्धचा त्यांचा सर्वात मोठा पराभव 48 धावांचा होता, जो आता 103 धावांपर्यंत पोहोचला आहे. दुसरीकडे, चेन्नई सुपर किंग्ससाठी हा विजय त्यांच्या इतिहासातील सर्वात मोठा ठरला. यापूर्वी त्यांनी 2015 मध्ये पंजाब किंग्सविरुद्ध 97 धावांनी विजय मिळवला होता.
या विजयामध्ये संजू सॅमसनसह अकील होसेनचीही महत्त्वपूर्ण भूमिका राहिली. इम्पॅक्ट खेळाडू म्हणून मैदानात उतरलेल्या अकील होसेनने शानदार गोलंदाजी करत 4 षटकांत केवळ 17 धावा देत 4 गडी बाद केले. त्याच्या अचूक आणि भेदक गोलंदाजीमुळे मुंबईचा डाव पूर्णपणे ढासळला.
एकूणच, चेन्नई सुपर किंग्जने सर्व आघाड्यांवर वर्चस्व गाजवत हा सामना सहज जिंकला. फलंदाजी, गोलंदाजी आणि रणनीती या तिन्ही बाबतीत त्यांनी उत्कृष्ट कामगिरी करत मुंबई इंडियन्सला त्यांच्या घरच्या मैदानावर पराभवाची चव चाखायला लावली. हा सामना आयपीएल इतिहासात दीर्घकाळ लक्षात राहील असा ठरला आहे.
