काल झालेल्या ऑस्ट्रेलियाविरुद्धच्या दुसऱ्या एकदिवसीय सामन्यात भारताला 2 विकेटने पराभवाचा सामना करावा लागला. मात्र सामन्यानंतर सर्वाधिक चर्चा झाली ती विराट कोहलीच्या सलग दुसऱ्यांदा ‘डक’वर बाद होण्याची. एकेकाळी ‘रन मशीन’ म्हणून ओळखला जाणारा कोहली आता अशा विक्रमामुळे चर्चेत आला आहे, जो कोणत्याही फलंदाजाला नकोसा वाटेल. आंतरराष्ट्रीय क्रिकेटमध्ये तो तब्बल 40 वेळा शून्यावर माघारी परतला आहे.
भारतासाठी सर्वाधिक वेळा शून्यावर बाद होणाऱ्या खेळाडूंच्या यादीत भारताचा वेगवान गोलंदाज जहीर खान सर्वात वर आहे. भारतासाठी तीनही प्रकारच्या 309 सामन्यांमध्ये खेळताना ते 43 वेळा ‘डक’वर बाद झाला. गोलंदाज म्हणून त्याने अनेक वेळा संघाला विजय मिळवून दिला, पण फलंदाज म्हणून त्याचे योगदान मर्यादित राहिले.
या यादीत दुसऱ्या क्रमांकावर आहे विराट कोहलीचे नाव. भारताचा सर्वाधिक विश्वासू आणि सातत्याने धावा करणारा फलंदाज मानला जाणारा कोहली आता 40 वेळा शून्यावर बाद झाला आहे. त्याच्या कारकिर्दीत जवळपास 28 हजार आंतरराष्ट्रीय धावा आणि 82 शतकांचा विक्रम आहे, परंतु हा ‘डक’ विक्रम त्याच्या सुवर्ण कारकिर्दीवरील एक छोटा डाग ठरला आहे. काल अॅडलेड येथे खेळल्या गेलेल्या दुसऱ्या वनडेमध्ये तो पुन्हा एकदा शून्यावर बाद झाला.
तिसऱ्या क्रमांकावर आहे इशांत शर्मा. बॉलची उंची आणि अचूक स्विंगसाठी प्रसिद्ध असलेल्या या वेगवान गोलंदाजाने आपल्या आंतरराष्ट्रीय कारकिर्दीत 40 वेळा शून्यावर बाद होण्याचा अनुभव घेतला. बचावात्मक फलंदाजीसाठी तो ओळखला जात असला, तरी मोठे धावसंख्येचे खेळ तो क्वचितच करू शकला.
भारताचा दिग्गज फिरकीपटू हरभजन सिंह चौथ्या स्थानावर आहे. जवळपास 20 वर्षांच्या दीर्घ कारकिर्दीत त्याने दोन कसोटी शतकं झळकावली, पण 37 वेळा शून्यावर बाद झाला. गोलंदाज म्हणून भारतासाठी अनेक निर्णायक सामने जिंकवून देणाऱ्या हरभजनला फलंदाजीमध्ये सातत्य साधता आलं नाही.
सध्याचा भारतीय वेगवान गोलंदाज जसप्रीत बुमराह पाचव्या क्रमांकावर आहे. त्याच्या नावावर आतापर्यंत 35 वेळा शून्यावर बाद होण्याची नोंद आहे. बुमराह हा फलंदाजांना त्याच्या घाबरवणाऱ्या यॉर्करसाठी आणि अचूक गोलंदाजीसाठी जगभर प्रसिद्ध आहे, पण फलंदाजीच्या बाबतीत त्याचं नावही या ‘डक क्लब’मध्ये समाविष्ट झालं आहे.
हा विक्रम खेळाडूंसाठी जरी अप्रिय असला, तरी तो दाखवतो की सर्वश्रेष्ठ क्रिकेटपटूंनाही कधी ना कधी अपयशाचा सामना करावा लागतो. आणि याच अपयशातून पुन्हा उभं राहण्याचा आत्मविश्वासच त्यांना महान बनवत असतो.
