Indian Women Cricket: वुमेन्स प्रीमियर लीग 2026 सुरू होण्यासाठी अवघे काही दिवस शिल्लक असतानाच रॉयल चॅलेंजर्स बंगळुरू संघाला मोठा धक्का बसला आहे. संघाची अनुभवी ऑस्ट्रेलियन अष्टपैलू खेळाडू एलीस पेरीने अचानक स्पर्धेतून माघार घेतल्याने RCB च्या टीम कॉम्बिनेशनवर परिणाम झाला आहे. मात्र या अनपेक्षित घडामोडीनंतर स्मृती मानधनाच्या नेतृत्वाखालील संघाने तातडीने पर्याय शोधत एका मराठमोळ्या खेळाडूला संधी दिली आहे.
ऑस्ट्रेलियाची दिग्गज खेळाडू एलीस पेरी ही RCB साठी अत्यंत महत्त्वाची खेळाडू मानली जात होती. लिलावात तब्बल 1 कोटी 70 लाख रुपयांना तिला संघात घेतले गेले होते. तिचा अनुभव, अष्टपैलू खेळ आणि दबावात कामगिरी करण्याची क्षमता RCB साठी मोठी ताकद होती. मात्र वैयक्तिक कारणांमुळे तिने WPL 2026 मधून माघार घेतल्याने संघ व्यवस्थापनासमोर मोठे आव्हान उभे राहिले.
हेही वाचा: Shah Rukh Khan: बॉलीवूडनंतर क्रिकेटमध्येही किंग! KKR साठी शाहरुख खानचा मोठा प्लॅन
या परिस्थितीत RCB ने पेरीच्या जागी महाराष्ट्राच्या सायली सातघरेला संघात सामील करून घेतले आहे. 25 वर्षीय सायली ही एक अष्टपैलू खेळाडू असून ती मध्यमगती गोलंदाजीसह फलंदाजीतही योगदान देऊ शकते. आतापर्यंत तिने भारतासाठी तीन एकदिवसीय सामने खेळले असून तीन विकेट्स तिच्या नावावर आहेत. आंतरराष्ट्रीय पातळीवर तिला अजून मोठ्या संधीची प्रतीक्षा असली, तरी देशांतर्गत क्रिकेटमध्ये तिची कामगिरी सातत्यपूर्ण राहिली आहे.
सायली सातघरे याआधी WPL च्या 2024 आणि 2025 हंगामात गुजरात जायंट्स संघाकडून खेळली आहे. त्या काळात तिला मर्यादित संधी मिळाल्या आणि ती केवळ चार सामने खेळू शकली. मात्र त्या थोड्याशा संधींमध्येही तिने आपली क्षमता दाखवून दिली होती. आता RCB कडून खेळताना तिला स्वतःला सिद्ध करण्याची मोठी संधी मिळणार आहे.
स्मृती मानधनाच्या नेतृत्वाखालील RCB संघासाठी सायलीची निवड रणनीतीच्या दृष्टीने महत्त्वाची ठरू शकते. भारतीय अष्टपैलू खेळाडू असल्याने संघाच्या समतोलात ती बसू शकते, तसेच स्थानिक परिस्थितीची चांगली ओळख हा तिचा मोठा फायदा ठरू शकतो. एलीस पेरीसारख्या अनुभवी खेळाडूची उणीव भरून काढणं कठीण असलं, तरी सायलीसाठी ही स्वतःची ओळख निर्माण करण्याची सुवर्णसंधी आहे.
दरम्यान, वुमेन्स प्रीमियर लीग 2026 ची सुरुवात 9 जानेवारीपासून होणार आहे. महिला क्रिकेटप्रेमींमध्ये या स्पर्धेबाबत मोठी उत्सुकता असून RCB चा संघ यंदा कशी कामगिरी करतो, याकडे सर्वांचं लक्ष लागले आहे. मराठी खेळाडूची एन्ट्री झाल्याने महाराष्ट्रातील क्रिकेट चाहत्यांचा उत्साहही दुणावला आहे.
