आपल्या दमदार अभिनयाने मराठी आणि हिंदी सिनेसृष्टीत आपली वेगळी छाप सोडणारे ज्येष्ठ अभिनेते नाना पाटेकर यांची कारकीर्द कायम स्मरणात राहील. त्यांनी साकारलेली प्रत्येक व्यक्तिरेखा प्रेक्षकांपासून ते समीक्षकांपर्यंत सर्वांच्या मनात घर करणारी ठरली. त्यापैकीच एक म्हणजे ‘नटसम्राट’ चित्रपटातील ‘आप्पा’ ही भूमिका. मराठी चित्रपटसृष्टी गाजवणाऱ्या या चित्रपटात नानांनी रंगभूमीवरील अजरामर ‘नटसम्राट’ हे नाटक रुपेरी पडद्यावर जिवंत केले होते.
या चित्रपटात त्यांना साथ दिली होती अभिनेत्री मेधा मांजरेकर यांनी. त्यांनी ‘कावेरी’ म्हणजेच आप्पाच्या पत्नीची भूमिका साकारली होती. चित्रपटात नाना कावेरीला प्रेमाने ‘सरकार’ अशी हाक मारायचे. आयुष्याचा मोठा काळ अभिनय क्षेत्राला वाहून घेतलेल्या एका कलाकाराला कौटुंबिक कलह, नात्यांमधील दुरावा आणि एकटेपणाचा कसा सामना करावा लागतो, यावर हा चित्रपट भाष्य करतो.
नानांच्या जाण्याने मेधा मांजरेकर यांनी सोशल मीडियावर दोघांचा एकत्र फोटो पोस्ट करत शोक व्यक्त केला आहे. पोस्टमध्ये त्या म्हणाल्या –
‘मला ‘नटसम्राट’मध्ये त्यांच्यासोबत काम करण्याची संधी मिळाली आणि त्यांच्या सहवासातील तो अनुभव मी कायम माझ्यासोबत जपून ठेवेन. नानांना अभिनय करताना पाहणे म्हणजे केवळ एका अभिनेत्याला पाहणे नव्हते. त्यातून तुम्ही कलेबद्दल, आयुष्याबद्दल आणि माणसांबद्दल काहीतरी शिकत होता. पण मला सर्वात जास्त आठवण राहील ती महान अभिनेते नाना पाटेकर यांची नाही. तर ती व्यक्ती, जिला मी ओळखत होतो.ते मला “सरकार” म्हणायचे.
प्रत्येक वेळी फोन केल्यावर ते म्हणायचे, “सरकार, कसा आहेस?” — कसे आहात? आणि हे कधीही केवळ औपचारिकता नसायची. त्यांना खरोखरच जाणून घ्यायचे असायचे. माझ्या कॅन्सरच्या काळातही… नाना फोन करून माझी विचारपूस करायचे. कोणतीही मोठी गोष्ट न करता, आपली काळजी दाखवण्याची त्यांची एक सुंदर पद्धत होती.
त्यांनी मला शेवटचा फोन सुमारे २० दिवसांपूर्वी केला होता…आणि पुन्हा, त्यांनी पहिली गोष्ट हीच म्हटली, “सरकार, कसा आहेस?” तेव्हा मला कल्पना नव्हती की मी ते शब्द शेवटच्या वेळी ऐकत आहे…लोक नानांना नटसम्राट म्हणून लक्षात ठेवतील—एक असाधारण अभिनेते, त्यांचा आवाज, त्यांची तीव्रता, त्यांनी प्रत्येक भूमिकेत आणलेला प्रामाणिकपणा.
मी सुद्धा हे सर्व लक्षात ठेवेन. पण मी त्या माणसालाही लक्षात ठेवेन, ज्याने फोन उचलून मला अगदी साधेपणाने आणि प्रेमाने विचारले, “सरकार, कश्या आहात?”
नाना, तुम्ही मला अशा आठवणी दिल्या आहेत ज्या मी आयुष्यभर जपून ठेवेन… तुम्ही सदैव आमचे नटसम्राट राहाल. ओम शांती’
