रेल्वे क्षेत्रात नोकरी करू इच्छिणाऱ्या आणि आयटीआय (ITI) उत्तीर्ण झालेल्या सुशिक्षित तरुणांसाठी एक अत्यंत सुवर्णसंधी उपलब्ध झाली आहे. ‘रेल्वे भरती कक्ष’ (RRC), जयपूर यांनी उत्तर पश्चिम रेल्वेच्या विविध विभागांमध्ये शिकाऊ उमेदवारांच्या एकूण 2,008 रिक्त जागा भरण्यासाठी नव्याने सुधारित अधिसूचना प्रसिद्ध केली आहे. विशेष म्हणजे या भरती प्रक्रियेसाठी कोणतीही लेखी परीक्षा किंवा मुलाखत घेतली जाणार नसून दहावी आणि आयटीआयमधील गुणांच्या आधारे तयार केलेल्या गुणवत्ता यादीनुसार उमेदवारांची थेट निवड केली जाणार आहे. या भरतीसाठीची ऑनलाइन अर्ज प्रक्रिया 23 ऑक्टोबर 2026 पासून अधिकृत संकेतस्थळावर सुरू होत आहे.
विभागांनुसार 2,008 जागांचे वर्गीकरण
या भरती मोहिमेद्वारे उत्तर पश्चिम रेल्वेअंतर्गत येणाऱ्या 8 मुख्य विभाग आणि कार्यशाळांमध्ये उमेदवारांना प्रशिक्षणाची संधी मिळणार आहे. एकूण 2,008 जागांपैकी जयपूर विभागात सर्वाधिक 549 पदे, बिकानेर विभागात 423 पदे, जोधपूर विभागात 445 पदे आणि अजमेर विभागात 402 पदे भरली जाणार आहेत. याव्यतिरिक्त बीटीसी कॅरेज अजमेर (101), बीटीसी लोको अजमेर (69), कॅरेज वर्कशॉप जोधपूर (67) आणि कॅरेज वर्कशॉप बिकानेर (33) या युनिट्समध्येही जागा रिक्त आहेत. यामध्ये इलेक्ट्रिशियन, फिटर, वेल्डर, डिझेल मेकॅनिक, सुतार, प्लंबर, सीओपीए (COPA) आणि स्टेनोग्राफर यांसारख्या अनेक तांत्रिक ट्रेडचा समावेश आहे.
हेही वाचा – SBI ग्राहकांसाठी मोठी बातमी! 3897 खातेदारांची वैयक्तिक माहिती ‘डार्क वेब’वर लीक; बँकेकडून चौकशी सुरू
शैक्षणिक पात्रता, वयोमर्यादा आणि निवडीचे निकष
या पदांसाठी अर्ज करू इच्छिणाऱ्या उमेदवाराने मान्यताप्राप्त शिक्षण मंडळातून किमान 50 टक्के गुणांसह 10 वीची परीक्षा उत्तीर्ण केलेली असावी. सोबतच NCVT किंवा SCVT द्वारे मान्यताप्राप्त संस्थेतून संबंधित ट्रेडमधील ‘नॅशनल ट्रेड सर्टिफिकेट’ (NTC/ITI) असणे अनिवार्य आहे. 22 नोव्हेंबर 2026 पर्यंत उमेदवाराचे वय किमान 15 वर्षे आणि कमाल 24 वर्षे असावे; राखीव प्रवर्गातील उमेदवारांना सरकारी नियमांनुसार वयोमर्यादेत सवलत लागू असेल. अर्ज करण्याची अंतिम मुदत 22 नोव्हेंबर 2026 (रात्री 11:59 वाजेपर्यंत) निश्चित करण्यात आली आहे. इच्छुक उमेदवारांनी अधिकृत पोर्टल rrcjaipur.in वर जाऊन वेळेत आपले अर्ज दाखल करावेत.
