युरोपातील प्रमुख देश असलेल्या स्पेनमधून एक अत्यंत भीषण आणि काळजाचा ठोका चुकवणारी दुर्घटना समोर आली आहे. माद्रिद शहराच्या दक्षिण भागात दोन अतिवेगवान हाय-स्पीड गाड्या एकमेकांवर आदळून झालेल्या भीषण अपघातात आतापर्यंत 46 प्रवाशांचा मृत्यू झाला आहे. स्थानिक प्रशासनाने दिलेल्या माहितीनुसार अनेक प्रवासी गंभीर जखमी झाले असून, ढिगाऱ्याखाली काही लोक अडकल्याचा संशय असल्याने मृतांची संख्या आणखी वाढण्याची मोठी भीती व्यक्त केली जात आहे. या महाभयंकर अपघातामुळे संपूर्ण युरोप खंडात हळहळ व्यक्त केली जात आहे.
टोलेडो परिसरात दुर्घटना; स्थानिक प्रशासनाकडून आकडेवारीला दुजोरा
हा भीषण अपघात स्पेनमधील टोलेडो (Toledo) या ऐतिहासिक शहराच्या परिसरात घडला. दुर्घटनेची माहिती मिळताच प्रादेशिक आपत्कालीन यंत्रणांनी घटनास्थळी धाव घेतली. सुरुवातीच्या टप्प्यात 10 जणांचे मृतदेह बाहेर काढण्यात आले होते, मात्र बचावकार्य जसजसे पुढे सरकले तसतसा हा आकडा थेट 46 वर पोहोचला. प्रादेशिक प्रशासनाच्या प्रवक्त्याने या घटनेला अत्यंत दुर्दैवी आणि धक्कादायक मानवनिर्मित आपत्ती म्हणून संबोधित केले आहे. रुळांवरून घसरलेल्या आणि एकमेकांत घुसलेल्या डब्यांमधून जखमींना बाहेर काढण्यासाठी मदत पथकांचे शर्थीचे प्रयत्न सुरू आहेत.
पंतप्रधान पेड्रो सांचेझ हादरले
स्पेनचे पंतप्रधान पेड्रो सांचेझ यांनी या दुर्घटनेवर तीव्र दुःख व्यक्त केले आहे. त्यांनी ‘एक्स’ (पूर्वीचे ट्विटर) या सोशल मीडिया प्लॅटफॉर्मवरून आपल्या भावना व्यक्त करताना सांगितले की, टोलेडो येथील भीषण अपघाताची बातमी ऐकून त्यांना प्रचंड धक्का बसला आहे. ते स्वतः परिवहन मंत्री आणि कॅस्टिला-ला मांचा प्रांताच्या मुख्य अध्यक्षांशी सतत संपर्कात राहून परिस्थितीवर बारीक लक्ष ठेवून आहेत. पीडितांना तात्काळ वैद्यकीय मदत आणि बचाव सेवा उपलब्ध करून देण्यासाठी सर्व उपलब्ध शासकीय यंत्रणांना घटनास्थळी रवाना करण्यात आले आहे.
हेही वाचा – हवेत 24 हजार फुटांवर विमानात हायजॅकिंगचा मेसेज! विमान माघारी फिरवत आपात्कालीन लँडिंग; संशयित प्रवासी ताब्यात
हाय-स्पीड रेल्वे जाळ्यावरील या वर्षातील दुसरी मोठी दुर्घटना
स्पेनमधील अत्याधुनिक मानल्या जाणाऱ्या हाय-स्पीड रेल्वे नेटवर्कवर या वर्षी घडलेली ही दुसरी मोठी धडक आहे. आगामी काळात स्पेनमध्ये निवडणुका होणार असून, पंतप्रधान पेड्रो सांचेझ यांच्यासाठी रेल्वे सुरक्षेचा हा मुद्दा अत्यंत संवेदनशील आणि आव्हानात्मक ठरणार आहे. सध्या सर्व आपत्कालीन यंत्रणा मदतकार्यात व्यस्त असून, या अपघाताचे नेमके कारण शोधण्यासाठी उच्चस्तरीय चौकशीचे आदेश देण्यात आले आहेत.
