आरोग्य, महसूल अन् पंचायत राज विभागात मोठे बदल; एकाच रात्रीत सात IAS अधिकाऱ्यांच्या तडकाफडकी बदल्या

योगी सरकारकडून सनदी अधिकाऱ्यांच्या बदल्यांचा धडाका सुरूच असून प्रशासनात पुन्हा एकदा मोठा फेरबदल करण्यात आला आहे. बुधवारी उशिरा रात्री राज्य शासनाने आदेश जारी करत 7 वरिष्ठ आयएएस (IAS) अधिकाऱ्यांच्या तडकाफडकी बदल्या केल्या आहेत. यामध्ये वैद्यकीय व आरोग्य, पंचायती राज, महसूल तसेच शहरी रोजगार विभागांमधील उच्च पदस्थ अधिकाऱ्यांचा समावेश आहे. विशेषतः आझमगड आणि आग्रा जिल्ह्यांतील मुख्य विकास अधिकाऱ्यांना (CDO) नवीन जबाबदाऱ्या सोपवण्यात आल्या आहेत. या अचानक झालेल्या बदल्यांमुळे प्रशासकीय वर्तुळात मोठी चर्चा रंगली आहे.

बदल्यांची प्रमुख सनदी अधिकाऱ्यांची यादी आणि नवीन जबाबदाऱ्या

राज्य शासनाने प्रसिद्ध केलेल्या अधिकृत परिपत्रकानुसार, वैद्यकीय आरोग्य आणि कुटुंब कल्याण विभागाचे विशेष सचिव धीरेंद्र सिंह सचन यांची पंचायती राज विभागाच्या संचालकपदी नियुक्ती करण्यात आली आहे. तर आझमगडचे मुख्य विकास अधिकारी राकेश कुमार पटेल यांची वैद्यकीय आरोग्य व कुटुंब कल्याण विभागाच्या विशेष सचिवपदी बदली झाली आहे. मुझफ्फरनगरचे मुख्य विकास अधिकारी कांडारकर कमलाकिशोर देशभूषण यांच्याकडे आता आझमगडचे नवे मुख्य विकास अधिकारी म्हणून सूत्रे सोपवण्यात आली आहेत.

हेही वाचा – डॉमिनोज पिझ्झाला FDA चा धक्का! मुंबईतील ‘या’ 3 आऊटलेट्सचे परवाने निलंबित

आग्रा व प्रयागराज विभागात नवीन नियुक्त्या; 1 अधिकारी प्रतीक्षा यादीत

इतर महत्त्वाच्या फेरबदलांमध्ये, आग्रा विभागाचे अतिरिक्त आयुक्त राजेश कुमार यांची शहरी रोजगार आणि दारिद्य्र निर्मूलन विभागाच्या विशेष सचिवपदी बदली करण्यात आली आहे. आग्राच्या मुख्य विकास अधिकारी प्रतिभा सिंह यांची आग्रा विभागाच्या अतिरिक्त आयुक्तपदी पदोन्नतीसदृश नियुक्ती झाली असून त्यांच्या जागी कानपूर देहातचे अतिरिक्त जिल्हाधिकारी अमित कुमार यांना आग्राचे नवीन मुख्य विकास अधिकारी बनवण्यात आले आहे. दुसरीकडे, प्रयागराज येथील महसूल परिषदेचे सदस्य देवेंद्र कुमार सिंह कुशवाह यांची बदली करण्यात आली असली तरी त्यांना सध्या कोणत्याही पदाचा कार्यभार न देता प्रतीक्षा यादीत ठेवण्यात आले आहे.