मुंबई : मुंबई आणि कसारा दरम्यान रेल्वेने प्रवास करणाऱ्या प्रवाशांसाठी महत्त्वाची बातमी आहे. आसनगाव-कसारा तिसऱ्या मार्गिकेच्या कामाला वेग देण्यासाठी मध्य रेल्वेकडून कसारा यार्डमध्ये विशेष वाहतूक आणि विद्युत ब्लॉक घेण्यात येणार आहे. हा ब्लॉक 31 ऑक्टोबर आणि 1 नोव्हेंबर रोजी पहाटे 3 ते सकाळी 5.30 या वेळेत असणार आहे. या ब्लॉकमुळे काही लोकल गाड्यांच्या थांब्यांमध्ये बदल करण्यात आले असून, अनेक लांब पल्ल्याच्या एक्स्प्रेस गाड्यांनाही विलंब होण्याची शक्यता आहे.
कसारा मार्गावरील लोकल गाड्यांवर परिणाम
कसारा यार्डमध्ये ओव्हरहेड उपकरणांची जोडणी करण्यासाठी हे काम हाती घेण्यात आले आहे. त्यामुळे कसारा येथून छत्रपती शिवाजी महाराज टर्मिनसच्या दिशेने पहाटे 3.51 आणि 4.59 वाजता सुटणाऱ्या लोकल गाड्या उंबरमाळी आणि खर्डी या स्थानकांवर थांबणार नाहीत. त्यामुळे या स्थानकांवरून प्रवास करणाऱ्या प्रवाशांनी घराबाहेर पडण्यापूर्वी लोकलचे वेळापत्रक तपासणे आवश्यक आहे.
अनेक एक्स्प्रेस गाड्यांना 20 मिनिटांचा विलंब
या विशेष ब्लॉकचा परिणाम लांब पल्ल्याच्या गाड्यांवरही होणार आहे. दानापूर-एलटीटी विशेष, नंदीग्राम एक्स्प्रेस, कर्मभूमी एक्स्प्रेस, अमरावती-सीएसएमटी, विदर्भ एक्स्प्रेस, देवगिरी एक्स्प्रेस, मंगला लक्षद्वीप एक्स्प्रेस, नागपूर-सीएसएमटी दुरांतो आणि राणी कमलापती-एलटीटी एक्स्प्रेससह पंजाब मेल या गाड्यांना 15 ते 20 मिनिटांचा विलंब होण्याची शक्यता आहे.
1 नोव्हेंबरला या गाड्यांवरही परिणाम
याशिवाय, 1 नोव्हेंबर रोजी धावणाऱ्या सहरसा-एलटीटी आणि शालीमार-एलटीटी एक्स्प्रेसच्या वेळापत्रकावरही या ब्लॉकचा परिणाम होऊ शकतो. त्यामुळे या गाड्यांनी प्रवास करणाऱ्या प्रवाशांनी रेल्वे प्रशासनाकडून मिळणाऱ्या अधिकृत सूचना आणि अद्ययावत वेळापत्रकावर लक्ष ठेवावे.
दरम्यान, आसनगाव-कसारा तिसऱ्या मार्गिकेचे काम पूर्ण झाल्यानंतर या मार्गावरील रेल्वे वाहतूक अधिक सुरळीत होण्यास मदत होणार आहे. मात्र, सध्या ब्लॉकमुळे प्रवाशांना काही प्रमाणात गैरसोयीचा सामना करावा लागू शकतो. त्यामुळे प्रवाशांनी प्रवासाचे नियोजन करताना या बदलांची नोंद घ्यावी.
