ग्राहकांना मोठा दिलासा! सोने-चांदीच्या किमती घसरल्या; जाणून घ्या तुमच्या शहरातील सोन्याचे दर

भारतीय सराफा बाजारात सोन्या-चांदीच्या किमतींमध्ये सातत्याने घसरणीचा कल पाहायला मिळत आहे. 23 ऑक्टोबर रोजी सकाळच्या सत्रात देशातील प्रमुख शहरांमध्ये 24 कॅरेट आणि 22 कॅरेट सोन्याच्या दरात लक्षणीय घट नोंदवली गेली आहे. राष्ट्रीय राजधानी दिल्लीमध्ये 24 कॅरेट सोन्याचा दर 1,44,520 रुपये प्रति 10 ग्रॅमवर पोहोचला आहे, तर आर्थिक राजधानी मुंबईत 24 कॅरेट सोन्याचा भाव 1,44,370 रुपये प्रति 10 ग्रॅम इतका झाला आहे. आदल्या दिवशी दिल्ली सराफा बाजारात सोन्याच्या दरात 1,000 रुपयांची मोठी घसरण झाली होती, ज्यामुळे सोन्याचे भाव गेल्या 3 महिन्यांच्या सर्वात नीचांकी स्तरावर आले आहेत. आंतरराष्ट्रीय बाजारातही सोन्याचे भाव प्रति औंस 4,041.39 डॉलर्सच्या पातळीवर व्यवहार करत आहेत.

मुंबई, पुणे आणि प्रमुख शहरांतील सोन्याचे ताजे दर

देशभरातील प्रमुख महानगरांमध्ये सोन्याच्या किमतीत घसरण झाल्याचे चित्र आहे.

• राजधानी दिल्लीमध्ये 22 कॅरेट सोन्याचा भाव 1,32,490 रुपये, तर 24 कॅरेट सोन्याचा भाव 1,44,520 रुपये प्रति 10 ग्रॅम नोंदवला गेला.
• मुंबई, कोलकाता, चेन्नई, पुणे आणि बेंगळुरू या प्रमुख शहरांमध्ये 22 कॅरेट सोन्याचा भाव 1,32,340 रुपये प्रति 10 ग्रॅम, तर 24 कॅरेट सोन्याचा भाव 1,44,370 रुपये प्रति 10 ग्रॅमवर राहिला.
• याशिवाय अहमदाबादमध्ये 22 कॅरेट सोन्याचा दर 1,32,390 रुपये, तर 24 कॅरेट सोन्याचा दर 1,44,420 रुपये प्रति 10 ग्रॅम नोंदवला गेला आहे.

सोन्या-चांदीच्या आयातीत मोठी घसरण; चांदी 2,24,900 रुपये प्रति किलोवर

जागतिक बाजारातील घडामोडींमुळे भारतात सलग दुसऱ्या महिन्यात सोन्याच्या आयातीत मोठी घट झाली आहे. सप्टेंबर महिन्यात सोन्याची आयात 81.27 टक्क्यांनी घसरून 1.8 अब्ज डॉलर्सवर आली आहे. याच कालावधीत चांदीची आयात 49.11 टक्क्यांनी घसरून 665 दशलक्ष डॉलर्सवर पोहोचली. चालू आर्थिक वर्षात एप्रिल ते सप्टेंबर दरम्यान सोन्याची एकूण आयात 27.32 टक्क्यांनी घटून 19.27 अब्ज डॉलर्स झाली आहे.

हेही वाचा – WL, RAC ला कंटाळलात? या प्रवाशांना मिळणार एक वर्ष आधी तिकीट बुकिंगची संधी; IRCTC चा नियम जाणून घ्या

दरम्यान, सोन्यासोबतच चांदीच्या किमतीही खालावल्या आहेत. 23 ऑक्टोबर रोजी देशांतर्गत बाजारात चांदीचा भाव प्रति किलो 2,24,900 रुपयांवर आला आहे. आंतरराष्ट्रीय स्तरावर चांदीचा स्पॉट दर 54.84 डॉलर्स प्रति औंस असून, चालू वर्षाच्या जानेवारीत चांदीने गाठलेली 4 लाख रुपये प्रति किलोची उच्चांकी पातळी आता बरीच खाली आली आहे.