मुंबई: महाराष्ट्राच्या राजकारणात सध्या सत्तासमीकरणांचे वारे वेगाने वाहत असतानाच, केंद्रीय निवडणूक आयोगाने राज्यसभेच्या रणांगणाचे रणशिंग फुंकले आहे. राज्याच्या विधिमंडळातील बदललेल्या समीकरणांच्या पार्श्वभूमीवर, महाराष्ट्रातील सात जागांसाठी राज्यसभेची द्विवार्षिक निवडणूक जाहीर झाली असून, राजकीय वर्तुळात आता 'आकडेमोडी'च्या राजकारणाला उधाण आले आहे. 16 मार्च रोजी होणाऱ्या या मतदानातून महाराष्ट्राचे दिल्लीतील प्रतिनिधी कोण असतील, याचा निर्णय होणार आहे.
राज्यसभेचा कार्यकाळ संपुष्टात येत असलेल्या दिग्गजांमध्ये राष्ट्रवादी काँग्रेसचे (शरदचंद्र पवार पक्ष) अध्यक्ष शरद पवार, केंद्रीय मंत्री रामदास आठवले, भाजपचे नारायण राणे आणि भागवत कराड, शिवसेनेच्या (उबाठा) प्रियंका चतुर्वेदी, काँग्रेसच्या रजनी पाटील आणि राष्ट्रवादीच्या (शरदचंद्र पवार) फौजिया खान यांचा समावेश आहे. या सात जागांसाठी निवडणूक आयोगाने आज अधिकृत कार्यक्रम जाहीर केला असून, 26 फेब्रुवारी रोजी निवडणुकीची अधिसूचना जारी होईल. 5 मार्चपर्यंत उमेदवारी अर्ज दाखल करता येतील, तर 9 मार्चपर्यंत अर्ज मागे घेण्याची मुदत असेल. 16 मार्च रोजी सकाळी नऊ ते दुपारी चार या वेळेत मतदान पार पडेल आणि त्याच दिवशी सायंकाळी पाच वाजता निकालाचे चित्र स्पष्ट होईल.
हेही वाचा: Pune News: पोहता येत नसतानाही पाण्यात उतरला, मित्रांसोबत फिरायला गेलेला आयुष घरी परतलाच नाही; मुळशीच्या लोटस पाँईंवर नेमकं काय घडलं?
राज्यसभेच्या निवडणुकीत विजय मिळवण्यासाठी विधानसभेतील संख्याबळ कळीची भूमिका बजावते. एका जागेवर विजय निश्चित करण्यासाठी उमेदवाराला 37.5, म्हणजेच 38 आमदारांच्या मतांची आवश्यकता भासणार आहे. सध्या विधानसभेत अस्तित्वात असलेल्या पक्षीय बलाब्लाचा विचार करता, ही निवडणूक अत्यंत चुरशीची नसली तरी रणनीतीच्या दृष्टीने महत्त्वाची ठरणार आहे. महायुतीकडे असलेले प्रचंड बहुमत आणि महाविकास आघाडीकडे असलेली मर्यादित कुमक, यामुळे निकालाचे पारडे एका बाजूला झुकलेले दिसत आहे.
सध्याच्या आकडेवारीनुसार, भारतीय जनता पक्ष आणि त्यांच्या मित्रपक्षांकडे 137 आमदार, उपमुख्यमंत्री एकनाथ शिंदे यांच्या शिवसेनेकडे 60 आमदार, तर दिवंगत अजित पवार यांच्या राष्ट्रवादी काँग्रेसकडे 41 आमदार आहेत. हे भक्कम संख्याबळ पाहता, भाजपला या निवडणुकीत सिंहाचा वाटा मिळणार हे निश्चित मानले जात आहे. राजकीय विश्लेषकांच्या मते, भाजपला सातपैकी चार जागा सहज मिळतील. तर, अजित पवार गट आणि शिंदे गटाला प्रत्येकी एक जागा मिळण्याची दाट शक्यता आहे. त्यामुळे महायुतीच्या वाट्याला एकूण सहा जागा जाण्याचे संकेत मिळत आहेत.
दुसरीकडे, महाविकास आघाडीची अवस्था 'तोंड दाबून बुक्क्यांचा मार' अशी झाली आहे. फुटलेल्या पक्षांमुळे संख्याबळावर मोठा परिणाम झाला आहे. उद्धव बाळासाहेब ठाकरे यांच्या शिवसेनेकडे 20, काँग्रेसकडे 16 आणि शरद पवारांच्या राष्ट्रवादीकडे अवघे 10 आमदार उरले आहेत. या तुटपुंज्या संख्याबळाच्या जोरावर महाविकास आघाडीला जेमतेम एका जागेवर समाधान मानावे लागण्याची चिन्हे आहेत. त्यामुळे शरद पवार, प्रियंका चतुर्वेदी यांसारख्या नेत्यांचे पुनर्वसन कसे होणार, हा प्रश्नही उपस्थित होत आहे.
एकंदरीतच, 16 मार्च रोजी होणारी ही निवडणूक केवळ औपचारिक असली तरी, उमेदवारी वाटपावरून महायुती आणि महाविकास आघाडीत काय खलबते होतात, हे पाहणे औत्सुक्याचे ठरेल. संख्याबळाच्या या गणितात भाजपचे 'कमळ' फुलणार हे स्पष्ट असले तरी, राजकीय पटावर ऐनवेळी कोणती नवी खेळी खेळली जाणार, याकडे सर्वांचे लक्ष लागून राहिले आहे.
हेही वाचा: Smartphone Security:फोन अचानक स्लो चालतोय? तुमचा मोबाईल हॅक झाल्याचे स्पष्ट संकेत कोणते, जाणून घ्या सविस्तर