सातारा : साताऱ्यातील पाटण तालुक्यातील ढेबेवाडी या निमशहरी गावात दिवसाढवळ्या 15 लाखांचे सोन्याचे दागिने लांबवल्याची घटना समोर आली आहे. बायकोच्या वाढदिवसाला सोने खरेदी करण्याच्या बहाण्याने आलेल्या चोराने मगर ज्वेलर्समधून हा ऐवज लंपास केला आहे. ही संपूर्ण चोरीची घटना दुकानातील सीसीटीव्ही कॅमेऱ्यात कैद झाली आहे.
चोरी केल्यानंतर पळून जाणाऱ्या या चोरांचा पाठलाग करण्याचा प्रयत्न काही जणांनी केला. मात्र, चोरांनी पाठलाग करणाऱ्यांच्या डोळ्यात चटणीची पूड फेकून पळ काढला. हे दोघे चोरटे दुचाकीवरून फरार झाले आहेत. दिवसाढवळ्या आणि गजबजलेल्या ढेबेवाडी येथील बाजारपेठेत घडलेल्या या दुसाहसी चोरीच्या प्रकारामुळे संपूर्ण ढेबेवाडी विभागात मोठी खळबळ उडाली आहे. स्थानिक नागरिकांमध्ये भीतीचे वातावरण निर्माण झाले असून पोलिस या प्रकरणाचा अधिक तपास करत आहेत.
